Úkimet basshysy Oqý-aǵartý mınıstrligine osy máseleni pysyqtaýdy tapsyrdy.
Úkimet basshysy Oqý-aǵartý mınıstrligi oqý baǵdarlamalary aıasynda qarjylyq saýattylyq kýrstaryn engizý máselesin pysyqtaýy kerektigi, Ǵylym jáne joǵary bilim mınıstrligi bul máselelerdi joǵary oqý oryndarymen birge qaraýy tıis ekenin aıtty, dep habarlaıdy Almaty-akshamy.kz
"Kámeletke tolǵan jastar ózderiniń qarjylyq múmkindikterin qalaı durys esepteý kerektigin, kredıtti qalaı jáne qandaı kredıt alý kerektigin naqty túsinýi kerek. Mundaı tájirıbe kóptegen elde bar", — dedi Álıhan Smaıylov.
Sondaı-aq Úkimet basshysynyń aıtýynsha, halyqtyń shamadan tys kredıt alý problemasyn sheshý quraldarynyń biri – azamattardyń tólem qabilettiligin qalpyna keltirý jáne bankrottyǵy ınstıtýty bolyp tabylady. Sonymen birge boryshkerlerdiń bárinde birdeı bankrottyq rásimin paıdalaný múmkindigi joq.
Problemalyq qaryz alýshylardy kóbirek qamtý úshin Qarjy mınıstrligi osy jyldyń sońyna deıin qujattar berýdi ońaılatý jáne sottan tys bankrottyqty qoldaný rásimin jetildirý jóninde sharalar qabyldaýy qajet.
"Biraq adamdarda "bankrot bolsaq, qaryzdy jaba salady eken" degen qate túsinik bolmaýy tıis. Bul – úlken jaýapkershiligi men belgili bir shekteýleri bar mańyzdy qadam", — dedi Premer-Mınıstr.
Oǵan qosa Úkimet basshysy búgingi tańda bank salasyndaǵy ınternet-alaıaqtyq ózekti máselege aınalǵanyn aıtty. Jalpy sońǵy jyldary mundaı faktilerdiń sany 5 esege deıin kóbeıip ketken.
"Osy jyldyń basynan beri ınternet-alaıaqtyqqa baılanysty 15 myńnan astam qylmystyq is tirkeldi. Keltirilgen zıannyń mólsheri 13 mlrd teńgeni qurady. Onyń 65%-yn shetelden kelgen alaıaqtar jasaǵan. İİM múddeli memlekettik organdarmen jáne mobıldi baılanys kompanıalarymen birge osyndaı jaǵdaılarǵa monıtorıńti kúsheıtip, alaıaqtyq faktisi boıynsha azamattardyń ótinishterin jedel qaraýy kerek", — dedi Álıhan Smaıylov.
Qorytyndylaı kele, Premer-Mınıstr halyqtyń shamadan tys nesıe alý máselesiniń utymdy sheshimi jańa óndirister men turaqty jumys oryndaryn qurý ekenin aıtty.
"Bul halyqtyń tabysyn arttyrýǵa jáne kredıt alýyn tómendetýge barynsha oń áser etedi. Osyǵan baılanysty jaýapty memlekettik organdar men ákimdikter josparlanǵan ınvestısıalyq jobalardy, ásirese shıkizattyq emes sektorlarda iske asyrýdy jedeldetip, jańa jobalardy pysyqtaýy tıis", - dep túıindedi Úkimet basshysy.