Qorǵanys mınıstrligi, UQK, İİM, TJM, Memlekettik kúzet qyzmeti, áskerı prokýratýra jáne basqa da mekemelerdiń qyzmetkerleri men áskerı qyzmetshiler osy baǵdarlamaǵa qatysa alady, dep habarlaıdy aqshamnews.kz
Otbasy bank 2025 jyldyń 17 qarashasynan bastap turǵyn úı tólemderin alýshylardan nesıe ótinimderin qabyldaýdy bastaıdy.
Bank bólimshelerine óz betińizshe barýdyń qajeti joq. Nesıe berý vedomstvolar (mınıstrlikter men qyzmetter) jasaıtyn tizimder boıynsha júrgiziledi. Bank mekemelerge arnaıy hattar jiberdi. Tizimder daıyn bolǵannan keıin ǵana turǵyn úı tólemin alýshylar bankke barady. Onda menedjer qyzmetkerdiń aty-jóni tizimde bar-joǵyn tekserip, sodan keıin nesıe ótinimin qabyldaıdy.
Jańa turǵyn úı satyp alǵysy kelgender “Naýryz Áskerı” jańa baǵdarlamasyna qatysa alady. Bul baǵdarlama boıynsha nesıe mólsherlemesi – 9%*. Tipti bastapqy jarnasyz da qatysýǵa bolady. Eger bastapqy jarna 0%-dan 20%-ǵa deıin bolsa, onda nesıe somasynyń eń joǵary mólsheri Almaty men Astana qalalary úshin – 36 mıllıon teńge, al basqa óńirler úshin – 30 mıllıon teńge bolady.
Eger bastapqy jarna 20%-dan 50%-ǵa deıin bolsa, bank eń joǵary nesıe somasyn 80 mıllıon teńgege deıin ulǵaıtýdy josparlap otyr. Turǵyn úıdi tek jaǵa úıden alýǵa bolady, - delingen bank habarlamasynda.
“Naýryz Áskerı” – bul “Naýryz” baǵdarlamasynyń taǵy bir baǵyty. Baǵdarlamany júzege asyrýǵa qajetti qarajat áleýmettik oblıgasıalar shyǵarý arqyly, ıaǵnı naryqtyq jaǵdaılarda tartylady. Sondyqtan baǵdarlama qatysýshylary úshin nesıe mólsherlemesin memleket sýbsıdıalaıdy. Bul shara azamattarǵa nesıeni qoljetimdi paıyzben alýǵa múmkindik beredi.
“Naýryz Áskerı” baǵyty boıynsha jańa turǵyn úıdi Baspana Market (otbasybank.kz) portalynda tańdap, brondap jáne satyp alýǵa bolady.
Eger turǵyn úı tólemin alýshylar daıyn (ekinshilik) turǵyn úı satyp alǵysy kelse, olar “Áskerı baspana” baǵdarlamasyn paıdalana alady. Bul baǵdarlama boıynsha nesıe mólsherlemesi – 18%. Bastapqy jarna 20%-dan 50%-ǵa deıin bolýy kerek. Qatysýshy eń kóbi 50 mıllıon teńgege deıin nesıe ala alady.
Baǵdarlamaǵa qatysýshy ózine unaǵan turǵyn úıdi ózi tańdaıdy.
Otbasy bankiniń turǵyn úı tólemin alýshylardy qoldaý nátıjeleri: Otbasy bank turǵyn úı tólemderin alatyn 44 103 adamnyń baspanaly bolýyna kómektesti. Bul maqsatqa jalpy 870,5 mıllıard teńge bólindi. Onyń ishinde áskerı baǵdarlamalar aıasynda 18 myń nesıe, jalpy somasy 428 mıllıard teńgege berildi.