Aqıyq aqyn Muqaǵalıdyń týǵanyna bıyl – 90 jyl.
Osyǵan oraı aqynnyń týǵan jeri Qarasaz tórinde mereıli mereke ótti, dep habarlaıdy Almaty-akshamy.kz.
Almatydan attanǵan, Altaı men Atyraýdan asyǵa jetken qaýymdy qara sózdiń kıesi qonǵan Qarasaz qushaq jaıyp, ándete-óleńdete qarsy aldy. Mereıtoıdyń alǵashqy kúninde qonaqtar aqyn murajaıymen tanysty. Sondaı-aq, kópshilik Muqaǵalıdyń týǵan mekeninen syr sherter «Qarasaz kósheleri» fılminiń kórsetilimine jınaldy. Túrtip qalsań, taýy men tasy da óleń oqıtyn aýyl aıryqsha atmosfera, bólekshe qýanyshqa bólene ketti.
«Bireýler «Ǵasyr aqyny» dep jatady. Ol ǵasyr aqyny emes, ol – ǵalamnyń aqyny. Ǵasyr aqyny dep qalypqa salýǵa bolmaıdy. Ózine sóz qudyretin Qudaı bere salǵan erekshe tulǵalar bolady, solardyń arasynda Muqaǵalı bir paıǵambarlyq qasıeti bar erekshe, eren tulǵa», – dedi aqyn, QR Jazýshylar odaǵy basqarma tóraǵasynyń orynbasary Baqyt Bedelhan.
Mereıtoıdyń ekinshi kúni «Alash jyrynyń aqıyǵy» atty ǵylymı-tájirıbelik konferensıadan bastaldy. Halyqaralyq deńgeıdegi is-sharaǵa túrki ádebı áleminiń ókilderi qatysyp, Muqaǵalı jyrynyń 7 tilge aýdarylǵanyn súıinshiledi. Sondaı-aq, Táýelsizdiktiń 30 jyldyǵy men Maqataevtyń 90 jyldyǵy tuspa-tus kelgen ýaqytta uıymdastyrylǵan baıqaýdyń jeńimpazdary da Qarasaz tórinde marapattaldy.
«Ákemizdi halyqtyń ózi dáriptep jatyr. Ýaqyt onyń poezıasynyń ómirsheńdigin kórsetti. Onyń áýletiniń atynan biz óte rızamyz», – deıdi aqynnyń uly Juldyz Maqataev.
90 jyldyqtyń basty jańalyǵy – Narynqol tórinde boı kótergen aqyn eskertkishi. Aýdan ortalyǵyndaǵy eńseli tas músinniń ashylýyna QR Memlekettik hatshysy Qyrymbek Kósherbaev pen QR Mádenıet jáne sport mınıstri Aqtoty Raıymqulova, sondaı-aq, Almaty oblysynyń ákimi Amandyq Batalov arnaıy keldi. «Óshpes mura, ólmes óleń qaldyrǵan Muqaǵalı alystaǵan saıyn, jaqyndaı túsedi», – deıdi atqaminerler.
«Hantáńiriniń máńgi muz basyp jatqan keýdesine kóktem ornatqan aqyn Muqaǵalıdyń 90 jyldyq mereıtoıy ótip jatyr. Barshańyzdy osy mereıtoımen quttyqtaımyn. Kishkentaı kezimnen men de osy Muqaǵalı óleńderin jastyǵymnyń astyna qoıyp, jattap óstim, sýyndap óstim. Men úshin Muqaǵalıdan asqan aqyn joq bolatyn», – deıdi aqyn, QR Parlamenti Májilisiniń depýtaty Maqpal Mysa.