Almaty qalasy boıynsha Qylmystyq-atqarý júıesi departamentine qarasty №11 mekemesinde jazasyn ótep jatqan jasóspirimderge qazaqtyń at ábzelderi, er-turmany tanystyryldy.
İsti bolyp, túzeý mekemesinde otyrǵan jastarǵa tanymdyq, rýhanı kesh syılaǵan – Ábilhan Qasteev atyndaǵy Qazaqstan Respýblıkasynyń memlekettik óner mýzeıiniń ǵylymı-zertteý magıstri Aqjigit Núsip. Óner ókili balalarǵa qazaq atamyz paıdalanǵan at jabdyqtarynyń hronologıasy, tıpologıasy, ádis-tásilderi jáne kórkemdik negizderi týraly aıtyp berdi. Taqyrypqa qyzyǵýshylyq tanytqan jastar mýzeıden kelgen qonaqqa túrli saýaldar qoıdy.
– Rýhanı qundylyqtarymyzdy nasıhattaıtyn osyndaı kezdesýler jasóspirimderdiń estetıkalyq talǵamyn arttyrady, ótkenin qadirleýge, tarıhty bilýge jeteleıdi dep bilemiz. Biz olarǵa qaıtken jaǵdaıda da jaqsy kúnderden kúder úzbeýine, áli de ómirin túzeýge múmkindik baryn uǵyndyryp, osyndaı tanymdyq keshter arqyly bilimin, zerdesin ashýǵa kómektesemiz, – deıdi №11 mekeme bastyǵy ádilet polkovnıgi Almat Súleımenov.