Eńbek jáne halyqty áleýmettik qorǵaý mınıstrliginiń málimetinshe, 2025 jyly respýblıkalyq búdjetten múgedektik jáne asyraýshysynan aırylý boıynsha járdemaqy tóleýge 488,5 mlrd teńge bólindi, dep habarlaıdy aqshamnews.kz
Buǵan qosa, Memlekettik áleýmettik saqtandyrý qory (MÁSQ) tarapynan eńbekke qabilettilikten aıyrylý jáne asyraýshysynan aırylý jaǵdaılaryna baılanysty 66,8 mlrd teńge kóleminde áleýmettik tólemder jasaldy.
2025 jylǵy 1 qazan jaǵdaıyna sáıkes, múgedektik boıynsha memlekettik áleýmettik járdemaqy alýshylardyń sany 544 myń adamdy, al asyraýshysynan aırylý boıynsha járdemaqy alýshylardyń sany - 155,9 myń adam.
Múgedektik boıynsha memlekettik áleýmettik járdemaqynyń mólsheri múgedektik toby men sebebine, sondaı-aq tıisti qarjy jylyna arnalǵan «Respýblıkalyq búdjet týraly» zańda belgilenetin eń tómengi kúnkóris deńgeıine baılanysty esepteledi.
Asyraýshysynan aırylý jaǵdaıyndaǵy járdemaqy mólsheri qaıtys bolǵan (qaza tapqan) adamnyń asyraýyndaǵy adamdar sanyna, ólim sebebine jáne kúnkóris mınımýmynyń mólsherine táýeldi.
Áleýmettik tólemderdiń kólemi ár adam úshin jeke esepteledi jáne ol kelesi kórsetkishterge baılanysty:
• sońǵy eki jyldaǵy MÁSQ-qa aýdarylǵan áleýmettik jarnalar eseptelgen ortasha aılyq tabysqa,
• eńbekke qabilettilikten aıyrylý koefısıentine,
• asyraýyndaǵy adamdar sanyna,
• mindetti áleýmettik saqtandyrý júıesine qatysý ótiline,
• tabys ornyn almastyrý koefısıentine.
2025 jylǵy 1 qańtardan bastap, kúnkóris mınımýmynyń ósýine baılanysty múgedektik pen asyraýshysynan aırylý boıynsha memlekettik áleýmettik járdemaqylar 6,5 %-ǵa ulǵaıtyldy.
Úkimet sheshimimen eńbekke qabilettilikten aıyrylý jáne asyraýshysynan aırylý jaǵdaılaryna baılanysty MÁSQ tólemderi de 6,5 %-ǵa artty.
Sonymen, jalpy aýrýdan múgedek bolǵandarǵa arnalǵan memlekettik áleýmettik járdemaqynyń mólsheri:
• I top – 101 702 teńge,
• II top – 81 362 teńge,
• III top – 55 474 teńge.
2025 jylǵy 1 qazan jaǵdaıyna sáıkes, eńbekke qabilettilikten aıyrylý boıynsha ortasha áleýmettik tólem mólsheri 72 087 teńgeni, al asyraýshysynan aırylý boıynsha – 75 064 teńge.