16-18 qyrkúıekte Almaty qalasyndaǵy «Eıs» sport kesheninde múgedek arbasyndaǵy tenısten el chempıonaty ótedi.
Qazaqstan tenıs federasıasynan málim etkenindeı, alǵash ret uıymdastyrylyp otyrǵan jarysqa elimiz óńirlerinen 12, 14, 16 jasqa deıingiler, 16-dan joǵary jasóspirimder jáne erler men áıelder qatysady. Olar jekeleı jáne juptyq synda básekege túsedi, dep habarlaıdy Almaty-akshamy.kz QazAqparatqa silteme jasap.
Qatysýshylar sanattaryna qaraı «Standart» jáne «Quads» toptaryna bólinedi.
Qazaqstan chempıonaty eki kezeńge sozylady. Birinshi kezeńde oıynshylar aınalma júıe boıynsha synǵa túsedi. Sosyn jartylaı fınal jáne fınaldyq básekeler bolady. Eki setten turatyn machta esep 4:4 bolǵan jaǵdaıda taı-breıkke ulasady.
«Bıyldan bastap Qazaqstan tenıs federasıasy arbadaǵy jáne adaptıvtik tenısti keńinen damytýdy qolǵa aldy. Munyń bolashaǵy zor. El chempıonatyn ótkizýdegi negizgi maqsat - balalar men eresekterdi adaptıvtik jáne paralımpıalyq tenıspen aınalysýǵa kóbirek tartý, sondaı-aq ulttyq qurama jasaqtaý úshin myqtylardy anyqtaý», - dedi federasıanyń sportty damytý jónindegi atqarýshy dırektory Deıv Maılı.