«Úzdik pedagog» 3,4 mıllıon teńge syıaqy alady
QR Oqý-aǵartý mınıstrligi 2023 jylǵy 21 shildedegi buıryǵymen "Úzdik pedagog" ataǵyn ıelenýshilerge syıaqy tóleý mólsheri qaǵıdalaryn bekitti.
Syıaqy mólsheri 1000 eselengen AEK mólsherine (nemese 2023 jylǵa 3 450 000) teń.
Syıaqyǵa tıisti qarjy jylyna bilim berý salasyndaǵy ýákiletti organǵa kózdelgen búdjet qarajaty esebinen tólenedi, sondaı-aq, bir ret ataq ıegeriniń shotyna aýdarylady.
Syıaqyny alý úshin muǵalimder konkýrs nátıjeleri jarıalanǵan kúnnen bastap 5 jumys kúni ishinde ýákiletti organǵa qolma-qol nemese elektrondy formatta mynadaı qujattar usynady:
- jeke basyn kýálandyratyn qujattyń kóshirmesi;
- ıegerdiń tańdaýy boıynsha ekinshi deńgeıdegi bankterde ashylǵan aǵymdaǵy shottyń nómiri týraly málimetter.
Qujattar tolyq jáne senimdi bolǵan jaǵdaıda, olar kelip túsken kúnnen bastap kúntizbelik 15 (on bes) kúnnen keshiktirmeı syıaqy ıegerdiń aǵymdaǵy shotyna aýdarylady.
"Úzdik pedagog" ataǵy jyl saıyn muǵalimderge konkýrstyq negizde beriledi.
Konkýrsqa bilim berý uıymdarynyń shtattyq oqytýshysy bolyp sanalatyn jáne konkýrsqa qatysý úshin qujattardy tapsyrý sátinde keminde bes jyl úzdiksiz pedagogıkalyq ótili bar bilim berý uıymdarynyń pedagogtary qatysady.
Baıqaý jyl saıyn úsh kezeńde ótkiziledi:
- I kezeń – aýdandyq, qalalyq (oblystyq, respýblıkalyq mańyzy bar qalalar) deńgeı;
- II kezeń – oblystyq (respýblıkalyq mańyzy bar qalalar men astana) deńgeı;
- III kezeń – respýblıkalyq deńgeı.
Aıta keteıik, "Úzdik pedagog" ataǵy bir oqytýshyǵa on jylda bir retten artyq berilmeıdi.
Buıryq 2023 jylǵy 12 tamyzdan bastap qoldanysqa engiziledi.