Monetalarda mán bar

Sońǵy ýaqyttarda elimizde koleksıalyq monetalardyń jıi shyǵatynyn baıqap júrmiz. Olar tarıhı-mádenı qundylyǵy bar mereıtoılyq kúnderge, tarıhı tulǵalarǵa, mańyzdy oqıǵalarǵa shyǵarylady. Alaıda, sany shekteýli. Sebebi, olar baǵaly. Erekshe metaldardan jasalady. Dızaıny da ózgeshe.

Uly aqyn Abaı Qunanbaevtyń 175 jyldy­ǵyna oraı 2020 jyly qyrkúıekte koleksıa­lyq moneta satylymǵa shyǵarylǵan. Moneta­lardyń syrt jaǵynda Abaı Qunanbaevtyń músindik portret beınesi túrli-tústi beıneleý tehnologıasyn qoldana otyryp oryndalǵan. Portrettiń oń jaǵynda – qazaqtyń kıiz úıi de­kory túrindegi oıý-órnek taspasy salynǵan. Nomınaly 500 teńgelik moneta kúmisten soǵyl­sa, 100 teńgelik melhıor jáne neızılber qospasynan jasalǵan. Aınalymǵa kúmisten jasalǵan nomınaly 500 teńgelik aqshanyń 1500 danasy daıyndaldy. 100 teńgelikterdiń melhıor qospasynan 8000 dana, neızılber qospa­synan 7500 dana shyǵarylǵan.

Sondaı-aq, aqyn Jambyl Jabaevtyń týǵa­nyna 175 jyl tolýyna oraı Ulttyq bank nomı­naly 100 teńgelik JAMBYL. 175 JYL kollek­sıalyq monetasyn aınalymǵa shyǵardy. Monetanyń reversinde Jambyl Jabaevtyń portrettik beınesi, ortalyǵynda «Artyqsha týǵan azamat» óleńiniń birneshe joly ornalas­tyrylǵan. Oń jaǵynda oıý-órnek úzindilerinen jasalǵan dombyra kontýrynyń aıshyqty beı­nesi men mereıtoı datasyn bildiretin «175 JYL» jazýy ornalasqan. Moneta 25 melhıor qospasynan, nomınaly 100 teńgelik, massasy – 15 gram, dıametri – 33 mm, daıyndaý sapasy brilliant uncirculated, taralymy 15 000 dana bolyp daıyndalǵan.

Byltyr elimizde Táýelsizdiktiń 30 jyldy­ǵyna arnalǵan TÁÝELSIZ QAZAQSTANǴA 30 JYL koleksıalyq nomınaldary 5000 jáne 500 teńgelik kúmisten jáne nomınaly 100 teńgelik melhıordan jasalǵan monetalardy satylymǵa shyǵardy. Dızaıny birtýar tarıhı tulǵalardyń portrettik beıneleri ornalastyrylǵan Táýelsiz Qazaqstannyń 1993 jylǵy úlgidegi banknotta­rynyń birinshi serıasymen sımvoldyq baıla­nysyn kórsetedi. Kompozısıa vızýaldy port­rettik qatardy aıaqtap, memleket tarıhyndaǵy mereıtoılyq kezeńdi logıkalyq túrde bildiredi. Kúmisten jasalǵan monetalar memlekettik, orys jáne aǵylshyn tilderinde QUB- tyń nómirlik sapa sertıfıkattary bar kádesyı oramynda shyǵaryldy.

2021 jyldyń 30 qarashasynan bastap «Dala qazynasy» serıasymen shyqqan JETI QAZYNA koleksıalyq monetalary satylymǵa shyqty. Altynnan, kúmisten jáne melhıordan daıyn­dalǵan koleksıalyq monetalary barlyq jeti dala qazynasynyń kórkem beınesin bir moneta­da kórsetedi. Tehnıkalyq sıpattamalary jaǵy­nan olar nomınaly 100 teńgelik monetalarǵa uqsas. Olarda «Er jigit», «Sulý áıel», «Aqyl- bilim» «Júırik at», «Qumaı tazy», «Qyran búrkit», «Beren myltyq» beınelengen.