Otandyq shıkizattan qant óndirý kólemi ósip, aq qant ımportynyń úlesi 58 paıyzdan 17 paıyzǵa deıin azaıady. Bul týraly Májiliste ótip jatqan Úkimet saǵatynda Aýyl sharýashylyǵy mınıstri Erbol Qarashókeev aıtty, dep habarlaıdy Almaty-akshamy.kz.
«Qant qyzylshasynyń ortasha jalpy ónimi 5 jyl ishinde (2017-2021 j.) 450 myń tonnany qurady, ortasha ónimdiligi 300 s/ga boldy. Basqa ózin-ózi qamtamasyz etetin memleketterde ónimdilik 440-480 s/ga qurap otyr. Salystyrmaly túrde qarasaq, Reseıde – 437 s/ga, Belarýste – 485 s/ga, Ýkraınada-445 s/ga. Iaǵnı elimizdegi ónimdilik deńgeıi tómendeý», - dedi E.Qarashókeev.
Onyń aıtýynsha, qant qyzylshasy egistikterin ulǵaıtýǵa bul saladaǵy joǵary shyǵyndar men óndiristiń tómen rentabeldigi, sondaı-aq sýmen qamtamasyz etý qıyndyqtary kedergi bolyp tur, dep jazady QazAqparat.
«Memleket basshysynyń tapsyrmasyna sáıkes, qant qyzylshasynyń egis alańdaryn keńeıtýdi, jańa sýarmaly jerlerdi engizýdi, sý únemdeıtin tehnologıalaryn iske qosýdy, tuqym sharýashylyǵyn damytýdy, sondaı-aq jańa ınovasıalyq zaýyt salýdy qamtıtyn 2026 jylǵa deıin qant salasyn damytý jónindegi keshendi jospar ázirlenip, bekitildi. Orta merzimdi perspektıvada jergilikti qyzylshadan qanttyń ishki qajet kólemin 43 paıyzǵa qamtamasyz etý úshin egis alańy ońtústik óńirlerde ulǵaıady. Otandyq shıkizattan qant óndirý 250 myń tonnaǵa deıin ósedi, sondaı-aq aq qant ımportynyń úlesi 58 paıyzdan 17 paıyzǵa deıin tómendetiledi», - dedi mınıstr.
Onyń sózine qaraǵanda, fermerlerdi qoldaý jáne olar úshin qantty óndirýdiń tıimdiligin arttyrý maqsatynda bıyl qant qyzylshasyn satyp alý baǵasy, sondaı-aq sýbsıdıa mólsheri artty. Máselen, qant zaýyttary tonnasyna 15 myń teńge, al memleket 25 myń teńge sýbsıdıa tóleıdi. Budan basqa, memlekettik qoldaý sharalaryn jetildirý jónindegi jumys aıasynda qyzylsha jınaıtyn kombaındar men basqa da tehnıkany satyp alýǵa ótemaqy normatıvin 50 paıyzǵa deıin arttyrý máselesi pysyqtalyp jatyr.