Iadrolyq medısına
Búgin Astanada QR Densaýlyq saqtaý mınıstri Ajar Ǵınıat sheteldik áriptestermen ózara yntymaqtastyqty tereńdetý máseleleri boıynsha birqatar kezdesýler ótkizdi, dep habarlaıdy Almaty-akshamy.kz.
Atom energıasy jónindegi halyqaralyq agenttiktiń (MAGATE) Bas dırektory Rafael Marıano Grossı myrzamen áńgimelesý barysynda mınıstr ózara senimge negizdelgen MAGATE-men densaýlyq saqtaý salasyndaǵy ekijaqty yntymaqtastyqtyń mańyzdylyǵyn atap ótti.
Kelissózder barysynda taraptar ZODIAC (zoonozdyq aýrýlar) baǵdarlamasy, "Rays of hope" (úmit sáýleleri) baǵdarlamasy sheńberindegi yntymaqtastyqty keńeıtý múmkindikterin qosa alǵanda, Qazaqstan men MAGATE yntymaqtastyǵynyń negizgi vektorlaryn jáne basqa da baǵyttardy talqylady.
Densaýlyq saqtaý mınıstrliginiń basshysy buǵan deıin MAGATE-men áriptestikti keńeıtý múmkindikteri qarastyrylǵanyn jáne ZODIAC baǵdarlamasyn iske asyrý maqsatynda yntymaqtastyqty jandandyrý qajet tórt negizgi baǵyt aıqyndalǵanyn eske saldy. Bul birlesken ǵylymı zertteýler júrgizý, kadrlar daıarlaý, bıoqaýipsizdik salasynda aqparat almasý, jabdyqtar men reaktıvterdi satyp alý boldy.
Ajar Ǵınıat MAGATE-degi áriptesterin ıadrolyq medısına tehnologıalaryn paıdalana otyryp, qaterli isikterdi dıagnostıkalaý men emdeýdiń jańa ádisterin ázirleý jáne klınıkalyq praktıkaǵa engizý bóliginde birlesken yntymaqtastyq máselesin qaraýǵa shaqyrdy.
Iadrolyq medısına radıoaktıvti ızotoptardy qoldaný arqyly dıagnostıka men emdeýdiń zamanaýı baǵyttarynyń biri bolyp tabylatyny belgili.
Búgingi tańda QR aýmaǵynda 10 PET/KT apparaty bar 7 ıadrolyq medısına ortalyǵy jumys isteıdi. Eki jyl buryn Qazaqstanda Semeı qalasynda alǵashqy Iadrolyq medısına jáne onkologıa ortalyǵy ashyldy. Bul ortalyqtyń jumys qaǵıdaty ártúrli aýrýlardy dıagnostıkalaý jáne emdeý úshin radıofarmasevtıkalyq preparattardy qoldaný bolyp tabylady. Sonymen qatar, atalǵan ortalyqtyń negizinde sıklotron iske qosyldy, ol qysqa ómir súretin radıofarmasevtıkalyq preparattardyń jeke óndirisin jáne PET/KT zertteýlerin júrgizýge múmkindik beredi.
Ári qaraı A. Ǵınıat densaýlyq saqtaý salasyndaǵy ınvestısıalyq jobalardy talqylaý maqsatynda "MEDEF International" fransýz bıznes-delegasıasynyń ókilderimen kelissózder júrgizdi.