Jer daýy
Armenıa men Ázirbaıjan bir-biriniń aýmaqtyq tutastyǵyn moıyndaǵan jaǵdaıda beıbit kelisimge kelýi múmkin. Armenıa Ázirbaıjannyń aýmaqtyq tutastyǵyn tolyq moıyndaıdy jáne KSRO kezindegi kartany negizge alýdy usynady. Bul týraly Parlamentte Armenıa Premer-mınıstri Nıkol Pashınán málimdedi, dep habarlaıdy Almaty-akshamy.kz QazAqparatqa silteme jasap.
«Eger eki el ekiushty jáne quıtyrqy oısyz bir-biriniń aýmaqtyq tutastyǵyn moıyndap, búgin de, keıin de aýmaqqa qatysty narazy bolmaıtynyna mindettelse Armenıa men Ázirbaıjan beıbit kelisimge qol jetkizýi múmkin. Qazir men Armenıa Respýblıkasy Ázirbaıjannyń aýmaqtyq tutastyǵyn tolyq moıyndaıtynyn rastaǵym keledi jáne Ázirbaıjan da Armán KSR aýmaǵyn Armenıa Respýblıkasyna tıesili dep moıyndaǵanyn kútemiz», - dep málimdedi Nıkol Pashınán 2022 jylǵy el úkimetiniń esebin usyna otyryp.
Onyń sózinshe, fakt júzinde taraptar bul týraly 2022 jyldyń 6 qazanynda Pragada jáne 2022 jyldyń 31 qazanynda Sochıde kelisip, kelisim jarıa málimdemede tirkelgen bolatyn.
«Soǵan qaramastan, Erevannan da, Bakýden de qarsy tarapty kelisimdi oryndamady dep aıyptaıtyn resmı málimdeme jasaldy. Sondaı-aq Armenıa beıbit kelisim kezinde Ázirbaıjannyń aýmaqtyq tutastyǵyn moıyndaýdan bas tartty nemese bas tartady degen pikirler – jalǵan, biz ony dáleldeı alamyz. Biz ózimiz beıbitshilik týraly kelisimge eki eldiń aýmaqtyq tutastyǵyn moıyndaý negizi retinde KSRO daıyndap, bekitken Armán men Ázirbaıjan KSR kartasyn engizýdi usynǵanbyz», - dep atap ótti Nıkol Pashınán.