Jańa qoldaý quraldary sheńberinde OTÓ-men shart jasasý kólemi 40%-ǵa artty
Premer-Mınıstr Oljas Bektenov AMANAT partıasy fraksıasynyń keńeıtilgen jıynynda Úkimet elimizdiń turaqty damýyn qamtamasyz etý jáne Memleket basshysynyń 2029 jylǵa qaraı ekonomıka ósimin $450 mlrd-qa deıin jetkizý jónindegi alǵa qoıǵan mindetine qol jetkizý úshin ekonomıka qurylymyn ózgertý boıynsha jumys istep jatqanyn atap ótti.
Ekonomıkalyq patrıotızm qaǵıdaty Úkimettiń negizgi basymdyǵy bolyp belgilendi.
«Biz qashan da otandyq óndirýshilerdi qoldaımyz. Memlekettik satyp alý sheńberinde tek qana jergilikti óndirýshilerden satyp alynatyn taýarlardyń tizbesi edáýir keńeıtildi. Sonyń ishinde hımıa ónerkásibi, qaǵaz ónimderi, mashına jasaý jáne jeńil ónerkásip salalarynda otandyq ónimderdi satyp alý kólemi aıtarlyqtaı ósýde. Qoryta aıtqanda, otandyq kásiporyndarmen jasalǵan sharttardyń sany 1,4 esege ulǵaıyp, jalpy somasy 40%-ǵa ósti», — dep atap ótti Oljas Bektenov.
Atap aıtqanda, Soltústik Qazaqstan oblysyndaǵy «Radýga» kompanıasynyń óndiristik júktemesi bıylǵy 7 aıdyń ishinde 12%-dan 100%-ǵa jetkizildi. Pavlodar oblysyndaǵy boıaý ónimderin shyǵaratyn «Lakra» kásipornynyń júktemesi 70%-ǵa deıin ósti. Al, «Jaıly mektep» ulttyq jobasy astanalyq «Metal Former» kompanıasyn 100%-ǵa júkteýge múmkindik berdi.
Sonymen qatar «Samuryq-Qazyna» qorynyń kompanıalar toby, jer qoınaýyn paıdalanýshy basqa da iri sýbektiler otandyq óndirýshilermen 635 mlrd teńge somasyna 382 kelisimshart jasasty.
Ekonomıka ósimin yntalandyratyn negizgi quraldardyń biri depýtattardyń qoldaýymen qabyldanǵan «Memlekettik satyp alý týraly» zań boldy. Bul óndirýshilerdiń múmkindikterin edáýir keńeıtedi jáne satyp alý salasyndaǵy zańsyz áreketterdiń aldyn alady. Zań aıasynda Biryńǵaı satyp alý platformasy iske qosyldy.
Taýarlardyń shyǵarylǵan elin aıqyndaý máseleleri boıynsha zań jobasy Májilistiń qaraýynda jatyr. Ol iri kásiporyndar úshin jergilikti óndirýshilermen uzaqmerzimdi sharttar, ofteık-kelisimsharttar jasasý, sondaı-aq elishilik qundylyqty damytý baǵdarlamasyn engizý boıynsha mindettemelerdi kózdeıdi.