Bul týraly Májilis depýtaty Erlan Saıyrov Májilistiń jalpy otyrysynda aıtty, dep habarlaıdy Almaty-akshamy.kz.
2022 jyly ıgerilmegen qarajat 325 mlrd teńgeni qurady. Bir jyl ishinde búdjet boıynsha qosymsha 8 túzetý, 1 naqtylaý júrgizilgen. Tek júrgizilgen túzetýlerdiń nátıjesinde 281 mlrd teńgege búdjet azaıtylyp, ákimshilerdiń shyǵysy 628,5 mlrd teńgege qaıta bólingen. Iaǵnı Parlamentte búdjettiń naqtylaýyn esepke almaǵanda, bul shamamen 1 trln teńge, - dep aıtty Májilis depýtaty.
Onyń aıtýynsha, bul másele memlekettik organdardyń, admınıstratorlardyń búdjet qarajatyn basqarý deńgeıiniń tómen ekenin jáne búdjettik tártiptiń aqsap turǵanyn kórsetedi, dep jazdy BAQ.KZ.
Bul Úkimettiń nemquraılylyǵynan týyndaıtyn táýekelderdi boldyrmaý úshin qandaı shara qabyldaısyzdar? Úkimet búdjetti basqarýdy ózi tártipke keltire almasa, onda zań deńgeıinde, ıaǵnı Májiliste búdjetke túzetýler sanyn shekteý jónindegi norma engizý qajet pe? – dep surady ol Premer-Mınıstrdiń orynbasary – Qarjy mınıstri Erulan Jamaýbaevtan.
Óz kezeginde Jamaýbaev depýtattyń suraǵyna jaýap berdi.
Qarjy mınıstri retinde kez kelgen qarjylyq tártipke nemese búdjetke qatysty usynystyń barlyǵyn qoldaımyn. Degenmen siz aıtyp otyrǵan túzetýdiń barlyǵyn naqtylaý zań aıasynda jasalǵan. Ol qajettilik pen naqty obektıvti sebepterge baılanysty. Qarjy mınıstrliginde memlekettik aýdıt komıteti bar. Osy komıtet byltyrdyń ózinde 500,2 trln búdjet qarajatyna 2 300-den asa aýdıtorlyq is-shara júrgizgen bolatyn. Iaǵnı Qarjy mınıstrligi de osy qarajatqa tıisti baqylaý júrgizip otyrady, - dep aıtty Qarjy mınıstri.