Bıyl 13-14 qarasha kúnderi Memlekettik qýyrshaq teatry qazaq ádebıetine ózgeshe órnek, ǵajaıyp syr-sıpat alyp kelgen kórnekti jazýshy Berdibek Soqpaqbaevtyń "Meniń atym Qoja" povesi tuńǵysh ret qýyrshaq beınesinde til qatpaq. Qazaq balalar ádebıetiniń úzdik týyndylary qatarynda ózindik jańasha baǵyt pen tereń astarly taqyryptardy qamtyǵan áıgili shyǵarma endi qýyrshaq teatry sahnasynda qaıta jańǵyrmaq.
Jetpis jylǵa jýyq ýaqyt ótse de, qaımaǵy buzylmaǵan Berdibek Soqpaqbaevtyń "Meniń atym – Qoja" povesi búgingi kúnge deıin óz mańyzyn joıǵan joq. Bul týyndy arqyly talaı býyn izgilik pen kereǵarlyqtyń, erkindik pen erkeliktiń arajigin ajyratyp, adamdyqtyń aq jolyn tańdaýǵa úırendi.
Qýyrshaq teatry sahnasyna laıyqtap, qaıta túrlendirgen ınsenırovka avtory – jas dramatýrg Damır Amantaı, al spektákldiń rejıseri – qýyrshaq teatry ónerinde ózindik qoltańbasyn qalyptastyryp, túrli janrdaǵy spektáklderdi sahnalap júrgen Erkebulan Qabdyl.
Erkebulan Qabdyl: "...Jańa spektáklde kórermenge burynnan tanys Qojanyń beınesi jańasha qyrynan ashylady. Onyń tentektigi men erkeliginiń astarynda jatqan adamgershilik, qamqorlyq jáne taza sezim názik túrde kórinis tabady. Qojanyń Janarǵa degen rıasyz súıispenshiligi, Jantasqa degen janashyrlyǵy men ádildikke umtylysy arqyly shyǵarmanyń basty ıdeıasy – balalyq pen adamdyqtyń úılesimi – sahnada kórkem qýyrshaq tilimen áserli baıandalady..." - deıdi rejıser.
"Meniń atym Qoja" – urpaqtan-urpaqqa jalǵasqan qazaq ádebıetiniń qazynasy. Bul týyndynyń qýyrshaq teatry sahnasynda jańasha túrlenýi – ulttyq mádenıet pen zamanaýı ónerdiń toǵysýynyń aıqyn kórinisi. Spektákl jas kórermenge ómirdiń mánin, adamdyq pen izgiliktiń qundylyǵyn uqtyryp, júrekke jylylyq uıalatady.
Memlekettik qýyrshaq teatry bul spektákl arqyly kórermenderin Qojanyń álemine saıahat jasap, balalyqtyń móldir sezimderi men shynaıy adamgershilik qundylyqtaryn qaıta sezinýge shaqyrady.
Kúni men ýaqyty: 13 qarasha 14:00, 14 qarasha 14:30
Orny: Memlekettik qýyrshaq teatry, Pýshkın k-si, 63