Deklarasıany turǵylyqty jeri boıynsha salyq organyna nemese elektrondy túrde tapsyrýǵa bolady.
Zań boıynsha 2021 jyly múlikti jalǵa bergen nemese múlikti satqan kezde qun ósiminen tabys tapqan jeke tulǵalar 2022 jyldyń 31 naýryzynan keshiktirmeı, salyq deklarasıasyn tapsyrýy qajet, dep habarlaıdy Almaty-akshamy.kz
Tabystyń naqty túrleri de anyqtalǵan. Olar:
salyq agentteri bolyp tabylmaıtyn tulǵalarǵa múlikti jalǵa berýden túsetin kiris;
jeke turǵyn úı qurylysy, saıajaı, jeke qosalqy sharýashylyq, garaj, páter, jer ýchaskeleri, mehanıkalyq kólik quraldary jáne tirkemeler boıynsha menshik quqyǵy bir jylǵa jetpegen jaǵdaıda qun ósiminen túsetin kiris;
jyljymaıtyn múlikti, jer ýchaskelerin jáne jer úlesterin, ınvestısıalyq altyndy, baǵaly qaǵazdardy, týyndy qarjy quraldaryn, zańdy tulǵanyń jarǵylyq kapıtalyna qatysý úlesin ótkizý kezinde qun ósiminen túsetin kiris;
talap etý quqyǵyn, onyń ishinde turǵyn úı qurylysyna úlestik qatysý týraly shart boıynsha turǵyn úıdegi (ǵımarattaǵy) úlesti talap etý quqyǵyn basqaǵa berýden túsetin kiris;
Qazaqstan Respýblıkasynan tys jerlerdegi kózderden alynǵan múlikti satýdan (múlikti, baǵaly qaǵazdardy, boryshtyq baǵaly qaǵazdardy, qatysý úlesin ótkizýden) túsken kiris;
jarǵylyq kapıtalǵa salym retinde múlikti (aqshadan basqa) berý kezinde qun ósiminen túsetin kiris;
shaǵyn bıznes sýbektileri úshin ne sharýa nemese fermer qojalyqtary úshin arnaýly salyq rejımin qoldanatyn dara kásipkerdiń ózge de aktıvterin satý kezinde qun ósiminen túsetin kiris.
Budan bólek, advokattar, notarıýstar, sot oryndaýshylary, medıatorlar, eńbekshi kóship kelýshiler-rezıdentter, úı qyzmetkerleri, beırezıdent-jeke tulǵalar, shet memleketterdiń dıplomatıalyq jáne olarǵa teńestirilgen ókildikterimen, konsýldyq mekemelerimen jasalǵan eńbek sharttary (kelisimsharttary) jáne (nemese) azamattyq-quqyqtyq sıpattaǵy sharttar boıynsha jumysker tabysyn alǵan azamattar, salyq agentteri bolyp tabylmaıtyn qoǵamdyq uıymdar men qorlar deklarasıanyń 240.00 formasyn tapsyrýǵa mindetti.
Sondaı-aq bul tizimge 2021 jylǵy 31 jeltoqsandaǵy jaǵdaı Qazaqstannan tys jerlerde tirkelgen jyljymaıtyn múlikke, baǵaly qaǵazdarǵa menshik quqyǵy, zańdy tulǵanyń jarǵylyq kapıtalyna qatysý úlesi bar jeke tulǵalar da kiredi.
Tabys salyǵynyń mólsheri kiristiń 10 prosentin quraıdy. Ony 10 sáýirden keshiktirmeı tóleý kerek.
Al deklarasıany turǵylyqty jeri boıynsha salyq organyna qaǵaz túrinde jáne «e-Salyq Azamat» mobıldi qosymshasy nemese cabinet.salyk.kz web-portalyndaǵy salyq tóleýshiniń kabıneti arqyly elektrondy túrde tapsyrýǵa bolady.