Memleket basshysy Qasym-Jomart Toqaev pen Kongo Demokratıalyq Respýblıkasynyń Prezıdenti Felıks Chısekedı kelissóz júrgizdi, dep habarlaıdy Aqshamnews.kz tilshisi Aqordaǵa silteme jasap.
Qazaqstan Prezıdenti Astanaǵa shaqyrýyn qabyl alǵany úshin Felıks Chısekedıge alǵys aıtty.
"Qazaqstanǵa alǵash ret memlekettik saparmen kelip jatsyz. Shyn máninde, muny tarıhı sapar deýge bolady. Saparyńyz óte mańyzdy. Bul qadam Qazaqstan men Kongo arasyndaǵy qarym-qatynasty damytýǵa tyń serpin beredi. Elińiz – adamı jáne tabıǵı resýrsqa baı memleket. Halyq sany 110 mıllıonnan astam el. Sondaı-aq Kongonyń halyqaralyq jáne aımaqtyq deńgeıdegi róli artyp kele jatyr. Osy oraıda búgingi kelissózder Ortalyq Azıa jáne Afrıka arasyndaǵy baılanysty kúsheıtýge yqpal etedi dep senemiz. Afrıka elderimen yntymaqtastyqty nyǵaıtý – elimizdiń syrtqy saıasatyndaǵy mańyzdy baǵyttyń biri", – dedi Qasym-Jomart Toqaev.
Sondaı-aq, Kongo Demokratıalyq Respýblıkasynyń Prezıdenti búgingi kelissózder nátıjesinde eki eldiń baılanysy nyǵaıa túsetinine senimdi ekenin jetkizdi
"Maǵan jáne delegasıamyzǵa kórsetken qonaqjaılyq nıetińiz úshin Sizge, sondaı-aq Qazaqstan halqyna alǵys aıtamyn. Men eki el, jalpy alǵanda, Afrıka aımaǵy men Ortalyq Azıa arasyndaǵy yntymaqtastyqty nyǵaıtý maqsatynda saparmen keldim. Árıne, bizdiń memleketterimiz bir birinen alysta ornalasqan. Degenmen osyndaı saparlar bizdi jaqyndastyryp, bir-birimizdi jiti tanýǵa múmkindik beredi. Sizdiń elińizben ERG kompanıasy arqyly tyǵyz jumys isteımiz. Atalǵan kásiporyn taý-ken ónerkásibi salasynda belsendi qyzmet etedi. Biraq yqpaldastyqty arttyryp, tájirıbe almasatyn basqa da kóptegen baǵyt bar dep oılaımyn", – dedi Felıks Chısekedı.
