Prezıdentke Shoqan Ýálıhanovtyń ómiri men eńbek joly, áskerı qyzmeti, tarıhı-etnografıalyq, georafıalyq zertteýleri jáne ǵumyrynyń sońǵy kezeńi týraly tarıhı derekter men jádigerler tanystyryldy, dep habarlaıdy almaty-akshamy.kz.
Qasym-Jomart Toqaev Shoqan Ýálıhanov jaıly jazylǵan eńbekterdiń bárin oqyp shyqqanyn eske salyp, onyń zertteý jumystarymen tanys ekenin aıtty. Sonymen qatar Prezıdent mýzeıdegi jádigerlerdi áli de tolyqtyra túsý kerek ekenine nazar aýdardy.
Prezıdent Qurmetti qonaqtar kitabyna qoltańbasyn qaldyryp, mýzeı qyzmetkerlerimen áńgimelesti.
Byltyr Memleket basshysynyń tapsyrmasy boıynsha mýzeıge jáne osy mádenı-týrıstik nysanǵa baratyn jolǵa jóndeý jumystary júrgizilgen bolatyn.
Sonymen qatar, Prezıdent Jetisý oblysynyń týrısik áleýetimen tanysty
Memleket basshysyna Shoqan Ýálıhanov atyndaǵy «Altynemel» memorıaldyq mýzeıinde Jetisý oblysynyń týrızm salasyn damytý úshin atqarylyp jatqan jumystar jóninde qysqasha málimet berildi.
Oblys ákiminiń orynbasary Rýstam Álıdiń aıtýynsha:
▪️týrızm salasynyń damýyna qatysty negizgi kórsetkishterde ósim baıqalady. Sońǵy úsh jylda óńirge kelgen týrıser sany eki ese artqan. Al osy saladaǵy kórsetiletin qyzmetter kólemi 16 mıllıard teńgege deıin ósti. Atalǵan baǵyttyń damýyna tyń serpin berý úshin birqatar ınfraqurylymdyq joba júzege asyrylyp jatyr;
▪️qazir Alakólge kóliktiń birneshe túrimen jetýge bolady;
▪️byltyr Úsharal áýejaıynyń ushý-qoný jolaǵyna rekonstrýksıa jasalyp, turaqty áýe qatynasy jolǵa qoıylǵan;
▪️bıyl «Astana – Dostyq» baǵyty boıynsha «Talgo» poıyzy iske qosyldy jáne «Úsharal – Dostyq» avtojolynyń rekonstrýksıasy aıaqtaldy;
▪️qazirgi kezde «Taldyqorǵan – Qalbataý – Óskemen» avtojolyn qaıta jóndeý, Alakól kýrorttyq aımaǵynda joǵary vóltty elektr jelilerin tartý jumystary júrgizilip jatyr;
▪️«Balqash» týrısik-rekreasıalyq aımaǵynyń bas jospary» ázirlendi;o
▪️onyń aıasynda uzyndyǵy 16 shaqyrym bolatyn jaǵalaýǵa búdjet esebinen ınjenerlik-kommýnıkasıalyq jeli tartylyp, jalpy aýmaǵy 860 gektar jerge 7 baǵyttaǵy demalys aımaqtary ornalastyrylady;
▪️jospar sheńberinde 30 mıllıard teńgege deıin jeke ınvestısıa tartý kózdelgen;
▪️kelesi jyly kólge aparatyn «Almaty – Óskemen – Lepsi – Aqtoǵaı» jolynyń rekonstrýksıasyn aıaqtaý josparlanyp otyr;
«Altyn-Emel», «Jońǵar Alataýy» ulttyq tabıǵı parkterinde ekologıalyq týrızmge basymdyq beriledi. Bıyl «Altynemel» vızıt-ortalyǵy ashyldy. Al «Jońǵar Alataýy» ulttyq parkiniń aýmaǵynda jalpy quny 1,7 mıllıard teńge bolatyn 8 ınvestısıalyq joba júzege asyrylmaq;
Tekeli mańaıynda shańǵy-bıatlon keshenin salý jáne Burqanbulaq sarqyramasyna deıingi joldy jóndeý jumystary josparlanǵan.
Prezıdent oblys ortalyǵyndaǵy drama teatryna esimi berilgen Qazaq SSR Halyq ártisi Bıken Rımovanyń bústine gúl shoǵyn qoıdy. Budan keıin Memleket basshysy teatr ǵımaratyn aralap kórip, Taldyqorǵan drama teatrynda Jetisý oblysynyń zıaly qaýym ókilderimen kezdesip, pikir almasty.
– Búgin, mine, halqymyzǵa tanymal asa kórnekti aktrısa Bıken Rımova teatrynda kezdesip otyrmyz. Óte qýanyshtymyn. Shyn máninde, biz ótken zamannyń qaıratkerlerine, olardyń eńbegine laıyqty, ádiletti baǵa berýimiz kerek. Bul elimizdiń bolashaǵy úshin, jas urpaqqa durys jol kórsetý úshin qajet, – dedi Prezıdent.
Memleket basshysy oblys zıalylaryna jastar tárbıesi men aımaqtyń keleshegi týraly oıyn aıtty.
– Biz elimizdiń bolashaǵy qandaı baǵytta damıtynyn oılasaq, eń aldymen, jastarymyzǵa kóńil bólýimiz kerek. Elimizdiń bolashaǵy jastardyń qolynda. Qaı jerge barsam da, únemi aıtyp júrmin. Jastarymyzdy kózi ashyq, kókiregi oıaý, adal azamat etip tárbıeleýimiz qajet. Bul – el damýynyń mańyzdy bir baǵyty. Al endi oblystyń damýyna keler bolsaq, óńirdiń áleýeti zor. Damý qarqyny jaqsy, áli de túıtkildi máseleler bar. Men oblystyń jaǵdaıyn jaqsy bilemin. Aldaǵy ýaqytta da nazar aýdaramyz, – dedi Qasym-Jomart Toqaev.
Kezdesýge qatysýshylar elimizdiń mádenıet salasyna erekshe kóńil bólinip, memlekettiń qoldaýyn sezinip otyrǵanyn jetkizip, Prezıdentke alǵys aıtty. Sonymen qatar oblys aqsaqaldary keshe Respýblıka kúninde ózińiz kótergen kók baıraǵymyz jyǵylmasyn degen tilegin bildirdi.