Qazaqstan Prezıdenti Reseı Úkimetiniń tóraǵasy Mıhaıl Mıshýstınmen kezdesti
Memleket basshysy Qazaqstan men Reseı úkimet basshylarynyń ótkizgen kelissózderiniń qorytyndysyn joǵary baǵalady, dep habarlaıdy Almaty-akshamy.kz. Akorda.kz saıtyna silteme jasap.
«Keshe Sizder óte mazmundy, tabysty kelissózder júrgizdińizder. Eki memlekettiń saýda-ekonomıka salasyndaǵy ózara is-qımyldyń qarqyndy damyǵanyn atap ótkim keledi. Yntymaqtastyqty odan ári qarqyndy damytýǵa múmkindik beretin mańyzdy kelisimderge qol qoıýǵa daıyndyq júrip jatyr. Pandemıaǵa baılanysty týyndap otyrǵan barlyq qıyndyqtarǵa qaramastan, eki el arasyndaǵy saýda ótken 5 aıdyń ishinde 26 paıyzǵa artty», – dedi Qasym-Jomart Toqaev.
Reseı Premer-Mınıstri Mıhaıl Mıshýstın Qasym-Jomart Toqaevqa qonaqjaılyǵy úshin alǵys bildirip, Prezıdent Vladımır Pýtınniń sálemin jetkizdi.
«Biz baýyrlas Qazaqstanmen aradaǵy dostyq, áriptestik jáne odaqtastyq qatynastarymyzdy joǵary baǵalaımyz. Úkimetterimiz arasyndaǵy baılanystardyń mazmuny tereń. Birlesip jumys jasaýǵa zor múmkindikter bar. Saýda-ekonomıkalyq yntymaqtastyǵymyz jaqsy damyp keledi. Osy jyldyń birinshi jartyjyldyǵynda ózara taýar aınalymy úsh esege artty. Jyldyń sońyna deıin saýda aınalymynan óte joǵary kórsetkishter kútemiz jáne oǵan barlyq múmkindikter bar. Investısıalyq baǵytta da ózara tabysty jumys istep jatyrmyz. Reseı bıznesi Qazaqstannyń 32 iri jobasyna qatysýda. Qazaqstandyq áriptesterimiz de Reseıdiń jobalaryna belsendi atsalysyp jatyr», – dedi Mıhaıl Mıshýstın.
Áńgimelesý barysynda Qazaqstan men Reseıdiń pandemıaǵa qarsy kúres jáne birlesip vaksına shyǵarý sıaqty ózara is-qımyldaǵy basym baǵyttar týraly sóz boldy.
Taraptar aımaqtar arasyndaǵy baılanystardyń oń qarqyny týraly da pikir almasty. Bul qatynastarǵa osy kúzde Kókshetaý qalasynda memleket basshylarynyń qatysýymen ótetin kezekti Aımaqaralyq yntymaqtastyq forýmy tyń serpin beredi.