Úkimettiń keńeıtilgen otyrysynda Prezıdent Qasym-Jomart Toqaev bereshegi 90 kúnnen keshikken adamdardy «jańa nesıeden arashalaıtyn» Jarlyqqa qol qoıatynyn málim etti.
Memleket basshysy tutyný nesıeleriniń shamadan tys artýyna jol bermeýdiń mańyzdylyǵyna toqtaldy, dep habarlaıdy Almaty-akshamy.kz QazAqparatqa silteme jasap.
«Ókinishke qaraı, beısanaly tutyný eleýli teńgerimsizdikterge ákelýi múmkin, olardyń belgilerin bıyl ǵana kórip otyrǵan joqpyz.
Búginde problemalyq nesıeler kólemi jarty trıllıon teńgege jetti. Mıllıonnan astam adam óz mindettemelerin oryndaı almaı otyr. Olardyń kóbi úmitsizdikten eski nesıeni óteý úshin jańasyn alýǵa májbúr. Sondyqtan 2023 jylǵy 1 qańtardan bastap «Jeke tulǵalardy ońaltý jáne olardyń bankrottyǵy týraly» zań iske qosylýy tıis», - dedi Prezıdent.
Memleket basshysynyń aıtýynsha, kepilsiz onlaın-mıkrokredıtterdi qatań retteý qajet.
«Keıbir elderde oǵan tolyq tyıym salynǵan. Bul tájirıbeni zertteý kerek. 90 kúnnen astam merzimi ótken bereshegi bar qaryz alýshylardy jańa mindettemeler qabyldaýdan arashalaý tetigin oılastyrý qajet. Jaqyn arada men tıisti Jarlyqqa qol qoıamyn», - dedi Qasym-Jomart Toqaev.