Prezıdent Sybaılas jemqorlyqqa qarsy is-qımyl agenttiginiń tóraǵasy Oljas Bektenovti qabyldady
Qasym-Jomart Toqaevqa elimizdegi sybaılas jemqorlyqqa qarsy is-qımylǵa qatysty qabyldanyp jatqan sharalar jóninde esep berildi, dep habarlaıdy Almaty-akshamy.kz Aqorda saıtyna silteme jasap.
Agenttiktiń deregi boıynsha, bıylǵy 5 aıdyń ishinde sybaılas jemqorlyqqa qatysty 1000-nan astam qylmystyq is tirkelgen. 600-den astam laýazymdy tulǵanyń jemqorlyq áreketi áshkerelengen. Olardyń 110-y – ártúrli deńgeıdegi basshylar.
Oljas Bektenov memleketke keltirilgen zalaldyń ótelýin qamtamasyz etý jónindegi Prezıdent tapsyrmasynyń oryndalý barysy týraly málimet berdi. Jyl basynan beri el búdjetine 220 mıllıard teńgeden astam qarjy qaıtaryldy.
Memleket basshysyna agenttiktiń bızneske zańsyz aralasýdan qorǵaý tetikterin qalyptastyrý úshin sharalar qabyldaǵany jóninde baıandaldy. İs-qımyl algorıtmi ázirlengen. Soǵan sáıkes tergep-tekserýdiń bastalýy men kásipkerlerge qatysty kez kelgen tergeý amaldary ortalyq apparattyń kelisimi arqyly júzege asyrylýy tıis.
Sonymen qatar «Atameken» Ulttyq kásipkerler palatasymen birlesip, memlekettik organdardyń bızneske zańsyz aralasý faktilerine jedel nazar aýdaratyn jumys toby quryldy.
Kezdesý sońynda Qasym-Jomart Toqaev sybaılas jemqorlyqqa qarsy jumystardy kúsheıtý jóninde birqatar naqty tapsyrmalar berdi.