Eki el arasyndaǵy kólik-tranzıt dálizi tabysty damyp keledi
Qasym-Jomart Toqaev Samarqand qalasynda ótip jatqan Shanhaı yntymaqtastyq uıymynyń samıti aıasynda Iran Islam Respýblıkasynyń Prezıdenti Ibrahım Raısımen kezdesti, dep habarlaıdy Almaty-akshamy.kz Aqordanyń resmı saıtyna silteme jasap.
Kezdesýde Qazaqstan Prezıdenti bıyl maýsym aıynda óziniń Tegeranǵa jasaǵan saparyn yqylaspen eske alyp, qol jetkizgen ýaǵdalastyqtardy júzege asyrý úshin Úkimetke tıisti tapsyrmalar berilgenin atap ótti.
Qazaqstan tarapy qysqa merzimde Iranǵa jetkiziletin taýarlar tizimin ázirlegen. Sondaı-aq bizdiń elimiz Iran tarapynyń da osyndaı taýarlar tizimin qarastyrýǵa jáne qoldaýǵa daıyn. Bul ekijaqty saýda-sattyq kólemin 3 mıllıard dollarǵa deıin arttyrý jónindegi maqsatqa qol jetkizýge septigin tıgizedi.
Prezıdent maýsym aıynda Tegeranda eki el basshylary negizin qalaǵan kólik-tranzıt dáliziniń tabysty damyp kele jatqanyna kóńili tolatynyn jetkizdi.
Kezdesýde tranzıttik júk tasymalyn odan ári ulǵaıtý maqsatynda «Qazaqstan-Túrikmenstan-Iran» temirjol tarmaǵynyń áleýetin damytýdyń mańyzdylyǵy, sondaı-aq Kaspıı mańy elderiniń porttary arasyndaǵy turaqty parom qatynasynyń múmkindikterin paıdalaný qajettigi atap ótildi.
Qasym-Jomart Toqaev mádenıet salasyndaǵy ekijaqty baılanystardy nyǵaıtýdyń mańyzdy ekenine toqtaldy. Qazaqstan eki el halqy úshin mańyzdy tarıhı tulǵalarǵa qatysty birlesken zertteýler uıymdastyrý jónindegi Irannyń bastamasyn qoldady.
Qazaqstan Prezıdenti Irannyń SHYU-ǵa tolyqqandy múshe bolýǵa degen nıetin quptady jáne Islam Respýblıkasynyń atalǵan uıymǵa qosylýy óńirlik ózara is-áreketti jandandyryp, onyń jumysyna tyń serpin beretinine senim bildirdi.
Óz kezeginde Iran Prezıdenti elderimizdiń saýda-ekonomıkalyq múmkindikteri mol ekenin, sondaı-aq yntymaqtastyqty nyǵaıtýǵa nıetti ekenin jetkizdi. Ibrahım Raısı qol jetkizilgen ýaǵdalastyqtardyń nátıjeleri keleshektegi ózara tyǵyz is-árekettiń berik irgetasy bolatynyna senim bildirdi.
Kezdesý sońynda Qasym-Jomart Toqaev Qazaqstan Iranmen aradaǵy yntymaqtastyqty jan-jaqty nyǵaıtýǵa beıildi ekenin aıtyp, Ibrahım Raısıdi elimizge qarymta saparmen kelýge shaqyrdy.