Ardagerlerge Altyn juldyz ben «Otan» ordeni tapsyryldy.
Mereke qarsańynda QR Prezıdenti Qasym-Jomart Toqaev soǵys ardagerleri Ábdiǵalı Qaımoldın men Ivan Gapıchke «Halyq qaharmany» ataǵyn berip, olardy aıryqsha erekshelik belgisi – Altyn juldyz ben «Otan» ordenimen marapattady, dep habarlaıdy Almaty-akshamy.kz Aqordaǵa silteme jasap.
Memleket basshysynyń Jarlyǵymen 1941–1945 jyldardaǵy Uly Otan soǵysynda kórsetken erligi, batyldyǵy, janqıarlyǵy men soǵystan keıin memlekettik jáne qoǵamdyq qyzmetke belsendi qatysqany úshin Ábdiǵalı Qaımoldınge «Halyq qaharmany» ataǵy berilip, aıryqsha erekshelik belgisi – Altyn juldyz ben «Otan» ordeni tapsyryldy.
Qaımoldın Ábdiǵalı, Uly Otan soǵysy jáne eńbek ardageri
1921 jyly 30 maýsymda Semeı oblysy Abyraly aýdany Uzynbulaq aýylynda dúnıege kelgen.
1941 jyly ásker qataryna shaqyryldy. 1941-1945 jyldyń 9 mamyry aralyǵynda Stalıngrad, 1-Ýkraına, 1-Belarýs, 3-Baltyq maıdandarynda shaıqasty. 1946 jyldyń maýsym aıynda ásker qatarynan bosatylǵan.
Atalǵan qyzmetten keıin partıada jáne memlekettik organdarda jumys istedi. Áýeli KOKP Semeı oblystyq komıtetinde, sodan keıin Jańasemeı, Novopokrovsk aýdandarynyń atqarý komıtetinde eńbek etti. 1977-1982 jyldary «Túrksib» sovhozy partıa komıtetiniń hatshysy bolyp jumys istedi jáne osy jerden qurmetti demalysqa shyqty.
Qyzyl juldyz jáne İ dárejeli Otan soǵysy ordenderimen, «Jaýyngerlik eńbegi úshin», «Kenıgsbergti alǵany úshin», «Germanıany jeńgeni úshin» medaldarymen marapattalǵan.
Sondaı-aq, Memleket basshysynyń Jarlyǵymen 1941–1945 jyldardaǵy Uly Otan soǵysynda kórsetken erligi men janqıarlyǵy úshin Jeńis paradynyń qatysýshysy Ivan Stepanovıch Gapıchke «Halyq qaharmany» ataǵy berilip, aıryqsha erekshelik belgisi – Altyn juldyz ben «Otan» ordeni tapsyryldy.
Gapıch Ivan Stepanovıch - Uly Otan soǵysy jáne eńbek ardageri
1923 jyly 2 aqpanda Aqmola qalasynda dúnıege kelgen.
Polshany, Chehoslovakıany, Ýkraınany azat etýge qatysty. Búkil soǵysty bastan ótkergen maıdanger fashıserdiń garnızondary men komendatýralaryn talqandaǵan, oq-dári jáne azyq-túlik qoımalaryn joıǵan otrádtyń jaýyngerlik operasıalaryna qatysqan.
Qyzyl juldyz jáne İİİ dárejeli Dańq ordenderimen, «Erligi úshin», «Jaýyngerlik eńbegi úshin», «Kenıgsbergti alǵany úshin», «Germanıany jeńgeni úshin» medaldarymen, «Prokýratýranyń qurmetti qyzmetkeri» tósbelgisimen, İ, İİ, İİİ dárejeli «Eren eńbegi úshin» medaldarymen, «Qurmet» ordenimen, İİ dárejeli «Dańq» ordenimen marapattalǵan. Batys Qazaqstan oblysynyń qurmetti azamaty.
1945 jyly 24 maýsymda Qyzyl alańda ótken Jeńis paradynyń qatysýshysy.