Prezıdent Qasym-Jomart Toqaevqa elimizdegi zańdylyq pen quqyqtyq tártiptiń jaı-kúıi, sondaı-aq qadaǵalaýshy organnyń qyzmetindegi basym baǵyttar jóninde málimet berildi.
Berik Asylov zańsyz ıemdenilgen aktıvterdi qaıtarý úshin qabyldanyp jatqan sharalar jáne osy maqsatta jańadan qurylǵan Komıtettiń qyzmeti týraly baıandady. Bas prokýrordyń aıtýynsha, Komıtet shetelge shyǵarylǵan aktıvterdi izdeý, zańsyz sqemalardy áshkereleý úshin jasandy ıntellektini paıdalaný arqyly IT tehnologıalardy qoldanady, dep habarlaıdy almaty-akshamy.kz.
Memleket basshysyna mańyzdy ınvestısıalyq jobalardy quqyqtyq turǵydan qoldaý jumystary jóninde aqparat berildi. Quramyna Syrtqy ister mınıstrligi, «Qazaq-Invest» UK» AQ, «Atameken» UKP ókilderi jáne Bıznes-ombýdsmen kiretin arnaýly Vedomstvoaralyq komısıa ınvestısıalyq ahýaldy jaqsartýǵa baǵyttalǵan alǵashqy sharalardy ázirledi. Prokýrorlar 900-den astam ınvestısıalyq jobany baqylaýǵa aldy. Qazirdiń ózinde 41 ınvestordyń túıtkildi máseleleri sheshimin tapty.
Prezıdentke ınvestısıanyń qaýipsizdigine kepildi kúsheıtý úshin ınvestısıalyq jobany júzege asyrýdyń búkil prosesin naqty ýaqyt rejıminde baqylaýda ustaýǵa múmkindik beretin sıfrlyq sheshimder engizý, sondaı-aq memlekettik organdardyń bızneske qatysty negizgi sheshimderin prokýrormen kelisý usynyldy.
Sonymen qatar Qasym-Jomart Toqaevqa úsh býyndy model aıasynda kásipkerlerdi qylmystyq qýdalaý 3 ese qysqarǵany (614-ten 204-ke deıin) jóninde málimet berildi. Jalpy, elimiz boıynsha 1041 tulǵanyń negizsiz qylmystyq qýdalaýǵa tartylýyna jol berilgen joq. Konstıtýsıalyq quqyq buzýshylyqtar sany 29 paıyzǵa qysqardy (310-nan 222-ge deıin).
Budan bólek, Prezıdentke azaptaýǵa qarsy is-qımyl sharalary jóninde baıandaldy. Mundaı áreketterdiń aldyn alý úshin 54 túzetý mekemesinde 29 myń beınekamera ornatylǵan, sáıkesinshe azaptaý faktilerine shaǵymdaný da 94-ten 17-ge deıin azaıǵan.
Sondaı-aq Bas prokýror qoǵamda rezonans týdyrǵan qylmystardyń tergelý barysy jóninde esep berdi. Atalǵan máselelermen qatar, halyqaralyq yntymaqtastyq baǵytynda atqarylǵan jumystardyń nátıjesi tanystyryldy. Atap aıtqanda, bıyl shetelden aýyr jáne asa aýyr qylmys jasady dep aıyp taǵylǵan 40 adam ekstradısıalandy. Jalpy Qazaqstan qylmystyq-quqyqtyq sala boıynsha alys sheteldiń 34 memleketimen 74 shartqa qol qoıdy.
Kezdesý sońynda Qasym-Jomart Toqaev elimizdiń tynys-tirshiligine qatysty barlyq salada zańnyń saqtalýyn qamtamasyz etý isin kúsheıtý qajet ekenine nazar aýdardy.