Bul jaıynda ótken senbide, ıaǵnı 11 qarasha kúni Er-Rıad qalasynda ótken samıttiń qorytyndy deklarasıasynda aıtyldy.
Senbi kúni Arab jáne birqatar Islam elderiniń basshylary Saýd Arabıasynyń astanasynda bas qosyp Palestına-Izraıl máselesin talqylady. Ásirese Gazada 11 myńnan astam adamnyń janyn jalmaǵan qandy qaqtyǵysty negizgi taqyryp etti. Jıyn sońynda taraptar ortaq deklarasıaǵa qol qoıdy. Onda Arab jáne Islam elderiniń Izraıldi áskerı qylmys boıynsha aıyptap, halyqaralyq sotqa shaǵym túsiretini aıtylǵan. Dálirek aıtsaq, Halyqaralyq qylmystyq sotynyń prokýrorynan Izraıldiń áskerı qylmystary boıynsha tergeý júrgizýdi talap etken, dep habarlaıdy almaty-akshamy.kz.
Deklarasıada Halyqaralyq sottyń prokýrorynan Izraıldiń osyǵan deıin Ierýsalımdi qamtyǵan Palestına jerinde jasaǵan áskerı qylmystaryna qatysty tergeýdi tolyq aıaqtaýdy talap etken. Sonyń qatarynda adamzatqa qarsy qylmys faktilerin de ashyq tergeýdi suraǵan.
Deklarasıa Islam yntymaqtastyq uıymy men Arab lıgasynyń barlyq múshelerine áskerı qylmys boıynsha halyqaralyq sot prokýrorynyń tergeýin qadaǵalaýdy mindettegen. Buǵan qosa 7 qazannan keıingi Izraıldiń áskerı ne soǵys qylmystaryna qatysty nemese gýmanıtarlyq quqyqtardyń buzylýyna qatysty derekterdi qujattap sotqa daıyndaýdy tapsyrǵan.
Aıta keteıik, buǵan deıin Halyqaralyq qaýymdastyq tarabynan da Izraıdi Gaza jerinde áskerı qylmys jasap jatyr degen aıyptaýlar aıtylǵan. Izraılge qarata BUU jaǵynan aıytylǵan aıyptardyń ishinde «soǵys qylmysyna» qatar «adamdardy kollektıvti jazalaý» sózi de qoldanylǵan edi. Resmı Tel-Avıv bul aıypty joqqa shyǵarady.
Er-Rıadtaǵy jıynda taǵy neler aıtyldy? Halyqaralyq qylmystyq sotynyń quzyreti qandaı? Soǵys qylmysy degen ne? Izraıl ústinen jasalǵan shaǵymnyń qandaı nátıjesi bolýy múmkin? Bul jaıynda tolyǵyraq «Almaty Aqshamynyń» №136 sanynan oqı alasyzdar.