Bul suraqqa jaýap bergen QR Bilim jáne ǵylym mınıstri Asqat Aımaǵambetov Facebook jelisindegi paraqshasynda jańa tártipti túsindirgen jazba jarıalady.
Mınıstrdiń málimdeýinshe, endi mektep dırektorynyń mindetin atqarýshy bolyp úsh aıdan artyq isteýge bolmaıdy, dep habarlaıdy Almaty-akshamy.kz
«Mektep dırektorlaryn taǵaıyndaýdyń jańa tártibine toqtalyp ótsem. Shyn máninde, bul – mektep dırektorlary, oqý meńgerýshileri, pedagogter jáne sarapshylarmen birlese bir jyldan asa ýaqyt atqarǵan tynymsyz jumystyń nátıjesi. Birinshiden, endi mektep dırektorynyń mindetin atqarýshy bolyp úsh aıdan aspaıtyn jáne bir retten artyq emes merzimde ǵana isteýge bolady. Osy kezeńde konkýrs ótkizilip, jańa basshy taǵaıyndalýy kerek», – dep jazdy mınıstr.
Aımaǵambetovtiń aıtýynsha, mektep dırektorynyń bos nemese ýaqytsha bos laýazymyna konkýrs týraly habarlandyrý bos oryn paıda bolǵannan keıin jeti jumys kúni ishinde bilim basqarmasynyń resmı saıtynda jáne akkaýntynda ornalastyrylýy kerek.
«Osylaısha bos nemese ýaqytsha bos dırektor laýazymyna konkýrs jarıalamaı-aq, jyldar boıy dırektordyń mindetin atqarýshy bolyp jumys istep júre berýge endi jol berilmeıdi», – dedi ol.
Onyń habaryna qaraǵanda, búgingi tańda elimizde mektep basshysy laýazymyna 700-den asa bos jumys orny bar jáne, sáıkesinshe, ol jerlerde dırektordyń mindetin atqarýshy adamdar jumys istep júr.
«Ekinshiden, erejede dırektordyń ýaqytsha bos laýazymyna (bala kútimine baılanysty demalys, oqý jáne t.b.) taǵaıyndaý reglamentteledi. Mundaı jaǵdaılarda da uıym basshysy tikeleı taǵaıyndaý emes, konkýrs arqyly anyqtalady. Úshinshiden, endi dırektor laýazymyna konkýrsty aýdandyq bilim bólimderi emes, oblystyq Bilim basqarmalary ótkizedi. Iaǵnı, konkýrstyq rásimderdi uıymdastyrady jáne dırektorlardy anyqtaıdy. Sodan keıin dırektordyń kandıdatýrasy boıynsha qujattar eńbek shartyn jasasý úshin bilim bólimine jiberiledi. 5 jylǵa taǵaıyndalady», – dep jazdy mınıstr.
Aımaǵambetovtiń aıtýynsha, baıqaý birneshe kezeńnen turady:
kandıdattardyń dırektor laýazymyna qujattardy tapsyrýy;
Bilim basqarmasyndaǵy kadr qyzmetiniń kandıdattyń biliktilik talaptaryna sáıkestigin baǵalaýy, konkýrsqa qatysýǵa ruqsat berýi;
úmitkerlerge arnalǵan elektrondyq testileý (basqarýshylyq quzyretter, pedagogıka, psıhologıa, QR Zańnamasy boıynsha testileý);
oqý ornynyń Qamqorshylyq keńesiniń aldynda mekteptiń damý josparyn qorǵaý (testileýdi sátti tapsyrǵan jaǵdaıda);
Bilim basqarmasyndaǵy áńgimelesý (Qamqorshylyq keńesiniń aldynda mekteptiń damý josparyn sátti qorǵap shyqqan úmitkerler jiberiledi).
«Qamqorshylyq keńesteriniń quramyna ata-analar, pedagogıka salasynyń eńbek ardagerleri, qoǵam qaıratkerleri, Úkimettik emes uıymdardyń ókilderi kiredi. Barlyq kezeńnen ótken úmitkermen bilim bólimi tıisti eńbek shartyn jasap, ony dırektor etip taǵaıyndaý týraly buıryq shyǵarady», – dedi Aımaǵambetov.