QTJ aı saıyn 1 mln tonnadan astam astyq tasymaldaıdy
Qazaqstandyq temirjolshylar 2022 jylǵy qazannan 2023 jylǵy qańtarǵa deıin 4,3 mln tonnadan astam astyq tasymaldady. Aı saıyn bir mıllıon tonnadan astas jańadan jınalǵan astyq tıeldi, dep habarlaıdy Almaty-akshamy.kz.
QTJ baspasóz qyzmetiniń málimetinshe, 2022 jyldyń qazan aıynda astyq tıeý kólemi 1 mln tonnany qurasa, bul 2021 jyldyń uqsas kezeńi kórsetkishinen 26%-ke artyq, qarashada – 1,1 mln tonna (+ 39%), jeltoqsanda-1,2 mln tonna (+33%). 2023 jylǵy qańtarda taǵy 1 mln tonna tıeý qamtamasyz etilse, bul ótken jyldyń sáıkes aıymen salystyrǵanda 22% artyq.
Qazaqstandyq astyq dástúrli túrde eldiń soltústik óńirlerinen Ortalyq Azıa elderine, Qytaıǵa jetkiziledi. Túrikmenstanǵa astyq eksporty 56%, Aýǵanstanǵa – 30%, Ózbekstanǵa – 8%, al Tájikstanǵa 10% ósti. QHR-ǵa otandyq ónim eksporty eki ese ósti.
Sonymen qatar sońǵy bes jylda Reseıden temir jol kóligimen elge astyq ákelý ulǵaıdy: 2022 jyly 100 myń tonnadan 1,5 mln tonnaǵa deıin, bul Qazaqstan aýmaǵy arqyly úshinshi elderge odan ári eksporttaý maqsatynda Reseı astyǵynyń "sur" ımportynyń bar ekendigin kórsetedi.
Temir jol kóliginde un tıeý 2022 jylǵy qazan – 2023 jylǵy qańtar aralyǵynda 1,2 mln tonnany qurady. Qazan aıynda 2021 jylǵy deńgeıge qaraǵanda 313 myń tonna (+32%), qarashada - 343 myń tonna (+28%), jeltoqsanda - 313 myń tonna (+19%) tasymaldandy. 2023 jyldyń qańtarynda un tıeý 19% ósip, 245 myń tonnany qurady. Ózbekstanǵa un eksporty 39%, Aýǵanstanǵa – 56%, Túrikmenstanǵa – 6% artty.
Qazirgi ýaqytta negizgi suranysqa ıe eksporttyq baǵyt Saryaǵash MATP arqyly Ortalyq Azıa elderi bolyp tabylady. Búginde stansıa óziniń tehnıkalyq múmkindikteriniń sheginde jumys isteýde. Ótkizý qabiletin arttyrý úshin jáne Saryaǵash arqyly tasymaldaýǵa suranystyń artýyn eskere otyryp, 2023 jyly Darbaza – Maqtaaral tarmaǵynyń qurylysyn bastaý josparlanýda.
Sonymen qatar Oazıs shekaralyq ótkelderi arqyly Ózbekstanǵa jáne odan ári, Bolashaq arqyly Túrikmenstanǵa, odan ári Aqtaý porty men termınaldary jáne odan ári Iranǵa ótetin baǵyttar júktelmegen jáne perspektıvaly bolyp qala beredi.
2023 jylǵy aqpanǵa júk jóneltýshilerdiń astyq júkterin tasymaldaýǵa arnalǵan negizgi jospary kelisildi.
QTJ ortalyq apparatynda jáne eldiń negizgi astyq-tıeý jáne astyq óńdeý óńirlerinde táýlik boıǵy rejımde jedel shtabtar jumys isteıdi. Kún saıyn júk jóneltýshilerdiń, óńirlik «Atameken» UKP, Aýyl sharýashylyǵy mınıstrligi basqarmalary men ınspeksıalarynyń, «Astyq Trans» AQ ókilderiniń jáne basqalardyń qatysýymen selektorlyq keńester ótkiziledi. Vagondardy berý jáne jınaý máseleleri boıynsha aqparatty jedel qabyldaý úshin chatqa eksporttaýshy kompanıalardyń 400-den astam ókili engizildi.
Kókshetaý jáne Qostanaı stansıalarynda vagondardy bólýdiń ashyqtyǵy úshin Qoǵamdyq keńester qurylyp, bólý kezinde ótinimderdi berý kezektiligi eskeriledi. Júk jóneltýshilerge yńǵaıly bolý úshin taýar kasalary táýlik boıy jumys rejımine aýystyryldy. Vagondardy berý men jınaýdy jedeldetý úshin tarmaq ıeleriniń manevrlik lokomotıvteriniń stansıa joldaryna shyǵý rásimi jeńildetildi. Qosymsha magıstraldyq lokomotıvter astyq óńirlerine kóshirildi.