Astana qalalyq jedel medısınalyq járdem stansıasynyń feldsheri Uldana Qaldarhanqyzy Myrzýan (marqum) "Erligi úshin" medalimen marapattaldy, dep habarlaıdy aqshamnews.kz
Marapattaý týraly jarlyqqa 2025 jyly 18 qarashada Memleket basshysy Qasym-Jomart Toqaev qol qoıdy.
"Memleket basshysynyń Jarlyǵymen qyzmettik boryshyn úlgili atqarǵany, qıyn-qystaý jaǵdaıda kórsetken erligi men janqıarlyǵy úshin Astana qalalyq jedel medısınalyq járdem stansıasynyń feldsheri Uldana Qaldarhanqyzy Myrzýan (marqum) "Erligi úshin" medalimen marapattaldy", delingen Aqorda jarıalaǵan Jarlyqta.
2025 jyly 8 qarashada Astanada Táýelsizdik dańǵyly boıyndaǵy turǵyn úı kesheniniń syrtqy kirpish qaptamasy opyrylyp, úıindi astynda qalǵan adamdardy qutqarý kezinde qalalyq jedel medısınalyq járdem stansıasy feldsheriniń basyna kondısıoner qondyrǵysy qulaǵan. Ol es-tússiz kúıde aýrýhanaǵa jetkizilgen. 12 qarashada densaýlyq saqtaý vıse-mınıstri Erbol Ospanov feldsherdiń jaǵdaıy aýyr kúıinde qalyp otyrǵanyn aıtqan. Al búgin, 18 qarashada 23 jastaǵy jas kelinshektiń qaıtys bolǵany belgili boldy. Densaýlyq saqtaý mınıstri Aqmaral Álnazarova qyzmet babynda qaza tapqan Uldana Myrzýannyń otbasyna kóńil aıtty.