2024 jyldyń mamyr aıynda 19 túrli áleýmettik azyq-túlik taýarlarynyń baǵasy 0,2%-ǵa tómendedi. Jalpy, azyq-túlik taýarlaryna deflásıa sońǵy 4 jylda alǵash ret baıqaldy, dep habarlaıdy almaty-akshamy.kz
Senbi kúni, 1 maýsymda Úkimettegi kezekti keńeste vıse-premer Serik Jumanǵarınniń tóraǵalyǵymen qazirgi baǵa jaǵdaıy qaraldy.
Osy keńesterde eldegi apta saıynǵy baǵa ındeksi egjeı-tegjeıli talqylanady. Baǵalar ósimi nemese tómendeýine jasalǵan taldaý arqyly Qazaqstannyń 20 óńirindegi 19 túrli áleýmettik azyq-túlik baǵasy qarastyrylyp, sebepteri anyqtalyp, qajet bolǵan jaǵdaıda birden baǵany turaqtandyrý úshin tapsyrmalar beriledi.
Bul joly da, saýda jáne ıntegrasıa birinshi vıse-mınıstri Aıjan Bıjanova eldegi azyq-túlik baǵasyna qatysty aptalyq nátıjeni usyndy. 10 aımaq mınýsqa shyqty (Abaı, SQO, Pavlodar, Qaraǵandy, Aqtóbe, Túrkistan, Jambyl, Qyzylorda, Atyraý oblystary jáne Astana), bes aımaq baǵanyń nóldik ósimin saqtap qaldy (SHQO, Almaty, Qostanaı, Jetisý oblystary jáne Almaty), taǵy bes óńirde (Aqmola, Mańǵystaý, BQO, Ulytaý oblystary jáne Shymkent) áleýmettik azyq-túlik taýarlary baǵasynyń 0,1%-0,6% óskeni tirkeldi.
Apta ishinde qyryqqabat baǵasy (-7,2%), qaraqumyq jarmasy (-1,7%), kúrish (-0,1%), kúnbaǵys maıy (-0,5%), taýyq eti (-0,2%), maılylyǵy 2,5% sút (-0,2%), S1 kategorıaly jumyrtqa (-0,6%) baǵasy arzandady. Sonymen qatar kartop, sábiz, pıaz baǵasynyń ósýi jalǵasýda. Qazaqstannyń úsh ońtústik óńirinde aıran baǵasynyń tutastaı alǵanda 0,3%-ǵa óskeni baıqaldy. Saýda jáne ıntegrasıa mınıstrliginiń málimetinshe, atalǵan ónim baǵasyn jergilikti iri óndirýshi kótergen. Serik Jumanǵarın BQDA-ǵa osy naryqtaǵy baǵanyń ósýiniń negizdiligine taldaý jasaýdy tapsyrdy.
Sonymen qatar keńeste bıylǵy maýsym aıyna arnalǵan kókónis baǵasynyń ındıkatıvti jobasy talqylandy. Baǵany ónimsiz deldaldardyń negizsiz kóterý múmkindigin boldyrmaý úshin Serik Jumanǵarın Saýda jáne ıntegrasıa mınıstrligine BQDA-men birlese otyryp, ekonomıkaǵa negizdelgen naryqtyq baǵany eseptep, kókónis baǵasyna ádil ındıkatıvti baǵalardy anyqtaýdy tapsyrdy.