Májilis 2025 jyldyń qorytyndy jalpy otyrysyn ótkizdi, dep habarlaıdy aqshamnews.kz
"Búgin biz 2025 jyldyń qorytyndy jalpy otyrysyn ótkizdik. Bul jyl saıası jaǵynan da, zańnamalyq turǵydan da oqıǵalarǵa toly boldy. Jyl basynda el damýynyń strategıalyq baǵytyn aıqyndaǵan, aýqymdy saıası reformalardyń negizin qalaǵan mańyzdy qujat – Memleket basshysynyń tarıhı Joldaýynyń úsh jyldyǵy atap ótildi. Osy aıtýly oqıǵaǵa oraı biz arnaıy bir plenarlyq otyrys ótkizdik. Jıyn qorytyndysy boıynsha, elimizdiń barlyq azamatyn ortaq maqsatymyz – Ádiletti Qazaqstan qurý jolynda toptasýǵa shaqyratyn qarar qabyldandy", – dedi Májilis tóraǵasy Erlan Qoshanov.
Bıylǵy jyl eldigimiz úshin mańyzy zor mereıtoılarǵa toly boldy.
"Qazaqstan Respýblıkasy Konstıtýsıasynyń 30 jyldyǵyn atap óttik. Ol – táýelsizdik pen quqyqtyq tártiptiń irgetasyna aınalǵan negizgi zańymyz. Memleket basshysynyń tapsyrmasy boıynsha depýtattardyń bastamashylyǵymen Konstıtýsıanyń 30 jyldyǵyna baılanysty raqymshylyq jasaý týraly zań qabyldandy. Ol izgiliktiń sımvolyna aınaldy deýge bolady. Elimizdegi 17 myńǵa jýyq sottalǵan adam osy raqymshylyq talaptaryna ilikti. Ótken jyl Uly Otan soǵysyndaǵy halqymyzdyń erligin eske alýǵa arnalǵan aýqymdy is-sharalar ótti. Májilis depýtattary da halyqaralyq deńgeıdegi jáne el ishindegi aýqymdy is-sharalarǵa qatysyp, Uly Jeńiske taǵzym etti. Bul tarıhı oqıǵa beıbit kúnniń baǵasyn tereń uǵyndyryp, surapyl soǵys jyldaryndaǵy qazaqstandyqtardyń eren erligi men qaısarlyǵyn taǵy da jadymyzda jańǵyrtty", – dedi Májilis spıkeri.
Onyń aıtýynsha, jurtshylyqpen tikeleı dıalog ornatqan biregeı alań – Ulttyq Quryltaı jıyndary jalǵasyn tapty. Osy oraıda Prezıdenttiń Býrabaıda sóılegen sózi baǵdarlamalyq sıpatqa ıe boldy.
Erlan Qoshanov 2025 jyl syrtqy saıası belsendilik artyp, mańyzdy halyqaralyq bastamalar qarqyn alǵan kezeńge aınalǵanyn basa aıtty.
"Memleket basshysy Birikken Ulttar Uıymy Bas Assambleıasynyń 80-shi sesıasynyń jalpy debatyna; Qytaıda ótken Shanhaı yntymaqtastyq uıymyna múshe elderdiń Memleket basshylary keńesiniń otyrysyna; Tájikstandaǵy TMD kóshbasshylary keńesiniń otyrysyna qatysyp, sóz sóıledi. Prezıdent Býdapeshtte ótken Túrki memleketteri uıymynyń beıresmı samıtine, sondaı-aq Qazaqstannyń álemdik arenadaǵy ustanymyn nyǵaıta túsetin basqa da mańyzdy halyqaralyq is-sharalarǵa qatysty. Budan bólek, jyl boıy Memleket basshysynyń strategıalyq mańyzdy saparlary men shetel basshylarynyń elimizge qarymta saparlary boldy.
Prezıdenttiń bastamasymen Birikken Ulttar Uıymynyń Ortalyq Azıa men Aýǵanstanǵa arnalǵan ornyqty damý maqsattary jónindegi óńirlik ortalyǵynyń ashylýy aımaqtyń strategıalyq mańyzy artyp kele jatqanyn kórsetedi. Bul Qazaqstannyń jahandyq dıalogtyń belsendi jáne senimdi qatysýshysy retindegi rólin taǵy bir naqtylaı tústi", – dedi Májilis tóraǵasy.