Almatyda jappaı aǵash pen gúl otyrǵyzý naýqany bastaldy. Mádenıet salasynyń ókilderi teatrlar men mýzeılerdiń, kitaphanalar men arhıv, zoobaq pen sırk aýmaǵyna, sondaı-aq qaladaǵy saıabaqtar men skverlerde 1000 túp alma aǵashyn otyrǵyzýdy josparlap otyr.
«Taza Qazaqstan» respýblıkalyq ekologıalyq aksıasy aıasynda ótip jatqan «Almaty – bizdiń ortaq úıimiz» naýqanyna ult janashyry, halyq aqyny, jazýshy, qoǵam qaıratkeri, Qazaqstannyń Eńbek Eri Muhtar Shahanov qoldaý kórsetti. Ol «Alataý» dástúrli óner teatry aldyna alma aǵashyn otyrǵyzyp, ekologıalyq sharanyń qalanyń tynys-tirshiligi úshin asa mańyzdy ekenin atap ótti.
«Bul – jaqsy qasıetterdi nasıhattaıtyn, yntymaq pen aýyzbirshilikke shaqyratyn jáne meıirimdilikke baýlıtyn úlken is-shara. Men 82 jasta bolsam da, ortaq múddemiz úshin azamattyq belsendilik tanytyp, aǵash otyrǵyzýǵa keldim. Ásem Almatymyzdy kórkeıtý jolynda qala turǵyndary ǵana emes, qonaqtary da atsalysýy qajet. Mundaı bastamalardy qoldaǵan durys dep oılaımyn. Almaty ekologıalyq mádenıet joǵary damyǵan qalaǵa aınalýǵa tıis. Soǵan tyrysýymyz kerek», – dedi Qazaqstannyń Eńbek Eri Muhtar Shahanov.
Sondaı-aq teatr aldyna QR Halyq artısi Tuńǵyshbaı Jamanqulov, QR Halyq artısi Ramazan Stamǵazıev, QR Eńbek sińirgen qaıratkeri Sáýle Janpeıisova, QR Eńbek sińirgen qaıratkeri Ardaq Isataeva, QR mádenıet qaıratkeri Qadyrǵalı Kóbentaı, QR Eńbek sińirgen qaıratkeri Erkin Shúkiman, dástúrli qazaq ánderin oryndaýshy Amangeldi Kúzeýbaı jáne mádenıet salasynyń basqa da tanymal ókilderi óz atynan alma kóshetin ekti. «Alataý» dástúrli óner teatrynyń aldyna barlyǵy 60 aǵash jáne 2500 gúl otyrǵyzyldy.
Buǵan qosa, Almaty haıýanattar baǵynyń aýmaǵynda sala qyzmetkerleri 250 túp shomyrt, mamyrgúl, tal, talshyn, badam, jańǵaq jáne kókterek otyrǵyzdy. Al Qazaq memlekettik sırkiniń aýmaǵynda 70 kóshet jáne 40 gúl, qalalyq mýzeıler aýmaǵynda 130 aǵash jáne 400-den astam gúl otyrǵyzyldy.
Aıta keteıik, 27 sáýir kúni Almatyda «Almaty – bizdiń ortaq úıimiz» naýqany aıasynda jappaı alma kóshetteri egiledi. «Almaty - baq qala» aksıasy barysynda barlyǵy 7 705 jasyl jelek, onyń 4 015 jemis (3 855 alma aǵashy) jáne 1 090 japyraqty aǵash, 2 600 buta (sántal, yrǵaı, qabyrjyq, qarjemis jáne t.b.) otyrǵyzyldy.
