Qazaqtyń jazýshy-dramatýrgi, QR Memlekettik syılyǵynyń laýreaty Dýlat Isabekovtiń Shyńǵysqannyń jary Bórtege arnalǵan pesasynyń álemdik tusaýkeseri Londonda ótti, dep habarlaıdy Almaty-akshamy.kz Inform.kz-ke silteme jasap.
Qazaqstannyń Ulybrıtanıadaǵy Elshiliginiń uıymdastyrýymen, Eýrazıalyq shyǵarmashylyq gıldıasynyń (London) qoldaýymen «Bórte, álem patshaıymy» qoıylymynyń halyqaralyq tanystyrylymy boldy. Spektákl aǵymdaǵy jyldyń jeltoqsan aıynda Melbýrn qalasynda (Avstralıa) kórsetiledi, al kelesi jyly uıymdastyrýshylar trýppanyń bul spektáklymen Ulybrıtanıa men AQSH-qa gastróldik saparyn josparlap otyr.
«Dýlat Isabekov qazaq ádebıetiniń aqıyq klassıgi sanalady, onyń pesalary Eýropa men Azıada álemniń kóptegen tilderinde qoıylyp, al kitaptary jarty ǵasyrdan astam ýaqyt boıy synshylar men oqyrmandardyń moıyndaýyna ıe bolýda.
Ǵalamdy dúrliktirgen Shyńǵys hannyń ómirinde úlken ról atqarǵan dana áıel Bórte týraly osy qoıylymda onyń qıyn ómiri men uly jaýlaýshynyń taǵdyryndaǵy sheshýshi róli baıandalady», - dep jazylǵan Elshilik habarlamasynda.
Spektákldi klasıkalyq pesany mýzykalyq fragmentteri bar spektáklge aınaldyrǵan áıgili avstralıalyq rejıser ári kompozıtor Ýorren Ýılls qoıýda.
Melbýrndaǵy qoıylymǵa kórnekti avstralıalyq mádenıet jáne óner qaıratkerleri, sondaı-aq áleýmettik ınklúzıvti Jas álem hory qatysady.
Joba Eýrazıa keńistigindegi halyqtardyń ulttyq mádenıetin ilgeriletý maqsatyn kózdeıtin brıtandyq qoǵamdyq uıym bolyp tabylatyn Eýrazıalyq shyǵarmashylyq gıldıanyń bastamasymen qolǵa alynýda. Atalaǵan uıym 2015 jyldan beri álemniń kóptegen elderinde halyqaralyq jobalardy sátti júzege asyryp keledi.