6 qazan kúni AES salý máselesine qatysty referendým kezinde Lıvanda saılaý ýchaskesi bolmaıdy.
Bul týraly Ortalyq referendým komısıasynyń hatshysy Muhtar Erman málimdedi, dep habarlaıdy aqshamnews.kz.
Sebebi elde áskerı qaqtyǵystar oryn alyp jatyr. Qazaqstan aýmaǵynan tysqary jerlerde 73 saılaý ýchaskesi qurylǵan, otandastarymyz 61 elde daýys bere alady.
Muhtar Erman, Ortalyq referendým komısıasynyń hatshysy:
- Búgin ǵana Syrtqy ister mınıstrligimen keńes ótkizdik. Áriptesterimizden Lıvandaǵy daýys berý ýchaskesi bolmaıtyny týraly aqparat aldyq. Bul elde keń aýqymdy áskerı qımyldar júrip jatqany belgili. Jaǵdaı óte aýyr, sondyqtan azamattarymyzdyń ómiri men densaýlyǵyna qaýip tóndirýge bolmaıdy. Sol sebepti 61 elde 73 ýchaske bolady, onda ýchaskelik komısıalar zań aıasynda qyzmetin júzege asyrady.