Sarapshylardyń aıtýynsha, pandemıa 3 jyldyń ishinde 7 mıllıon adamnyń ómirin qıǵan.
Koronavırýs ınfeksıasy tolyq joıylmaıdy. Ol adamdarda kezdesetin túrli aýrýlar sekildi qalyp qoıady. Sondyqtan vırýspen ómir súrýdi úırený qajet. Dúnıejúzilik densaýlyq saqtaý uıymynyń mamandary osyndaı baılamǵa keldi, dep habarlaıdy Almaty-akshamy.kz Almaty.tv-ge silteme jasap.
Sarapshylardyń aıtýynsha, pandemıa 3 jyldyń ishinde 7 mıllıon adamnyń ómirin qıǵan. Onyń 2 mıllıony eýropalyqtar eken. "Al qazir KOVID-19 mýtasıalanǵandyqtan, indet juqtyrǵandar uzaq ýaqyt aýyryp jatyr. Tipti ólim jaǵdaılary da azaımaı tur. Bul rette naýqastarǵa vaksınanyń úshinshi mólsherin alýǵa keńes berý qıynǵa soǵýda", - deıdi sheteldik dárigerler.
«Mıllıondaǵan eýropalyqtar koronavırýspen aýyryp, jazyldy. Áli de syrqattanyp júrgenderi bar. Bul – kovıdtiń uzaqqa sozylatyn túri. Biraq, ázirge naqty qansha adamda osy sımptom bar ekeni belgisiz. Sondyqtan bul óte mańyzdy másele jáne nazardan tys qalmaıdy. Vaksına ǵana indettiń qarqynyn tómendetýge kómektesti. Alaıda vırýstyń joıylmaıtyny anyq», – dedi densaýlyq saqtaý salasynyń sarapshysy Djeffrı Lazarýs.
Al elimizde epıdemıologıalyq ahýal turaqty bolǵanymen, sońǵy táýlikte kórsetkish kúrt ósip otyr. Keshe koronavırýsty juqtyrǵandar sany 22 bolsa, búgin naýqastar qatary eki esege artyp, 46-ǵa jetti. Densaýlyq saqtaý mınıstrliginiń málimdeýinshe, 8 adamnyń jaǵdaıy aýyr.