Jańa fýnksıa qaladaǵy jol qaýipsizdigin qamtamasyz etýge baǵyttalǵan
Almatyda patrúldik polısıa kólikterine «Sergek» kamerasy ornatyldy. Bul týraly qalanyń tártip saqshylary málimdedi, dep habarlaıdy Almaty-akshamy.kz Almaty.tv-ge silteme jasap.
Qurylǵy memlekettik tirkeý nómiriniń jalǵan emestigin, tehnıkalyq baıqaýdyń jáne saqtandyrý polısiniń bar-joǵyn, tólenbegen aıyppuldardy jáne kóliktiń qandaı da bir qylmysqa qatysyn anyqtaı alady. Sonymen qatar, qurylǵy qoǵamdyq kólikke arnalǵan jolaqtaǵy jol qozǵalysy erejesin buzý deregin túsiredi. Al sybaılas jemqorlyqtyń aldyn alý úshin tártip saqshysynyń jumys kezindegi is-áreketi baǵdarlamaǵa tirkeledi.
«Jańa fýnksıa qaladaǵy jol qaýipsizdigin qamtamasyz etýge jáne jol-kólik oqıǵalaryn azaıtýǵa baǵyttalǵan. Kameranyń kómegimen qurylǵy ketip bara jatqan kólikti anyqtap, nómirdi tanıdy jáne derekterdi ortalyq júıege jiberedi. Qazir qalada jobanyń pılottyq nusqasyn paıdalanyp jatyr», – dedi polısıa departamenti ákimshilik polısıa basqarmasynyń bastyǵy Nurlan Amanbek.