Sottyń sheshimi buqaralyq aqparat quraldarynda jarıalanady.
QR Parlamentiniń bir top depýtaty Konstıtýsıalyq sotqa QR Konstıtýsıasynyń 62-babynyń 4-tarmaǵyn resmı túsindirý týraly ótinish jasady, dep habarlaıdy Almaty-akshamy.kz QazAqparatqa silteme jasap.
«Konstıtýsıalyq sot Qazaqstan Respýblıkasy Parlamentiniń bir top depýtattarynyń Qazaqstan Respýblıkasy Konstıtýsıasynyń 62-babynyń 4-tarmaǵyn resmı túsindirý týraly ótinishin konstıtýsıalyq is júrgizýge qabyldady», - delingen Konstıtýsıalyq sottyń resmı saıtynda jarıalanǵan aqparatta.
Taratylǵan málimetke qaraǵanda, «Qazaqstan Respýblıkasynyń Konstıtýsıalyq soty týraly» Konstıtýsıalyq zańyna sáıkes, atalǵan ótinishti Konstıtýsıalyq sottyń otyrysynda qaraý úshin qajetti materıaldardy daıyndaý jumysy júrgizilip jatyr. Konstıtýsıalyq sottyń sheshimi buqaralyq aqparat quraldarynda jarıalanady.
Aıta keteıik, QR Konstıtýsıasynyń 62-baby 4-tarmaǵynda Konstıtýsıalyq zańdar Konstıtýsıada kózdelgen máseleler boıynsha ár Palata depýtattarynyń jalpy sanynyń keminde úshten ekisiniń kópshilik daýsymen qabyldanatyndyǵy jazylǵan.
Konstıtýsıalyq sot azamattardyń joldanymdary boıynsha Qazaqstan Respýblıkasynyń Konstıtýsıasynda bekitilgen olardyń quqyqtary men bostandyqtaryn tikeleı qozǵaıtyn Qazaqstan Respýblıkasynyń normatıvtik quqyqtyq aktileriniń Qazaqstan Respýblıkasynyń Konstıtýsıasyna sáıkestigin qaraıdy.
Azamattardyń júginý sharttary men tártibi Konstıtýsıalyq zańnyń 45-babynda anyqtalǵan. Eger joldanym azamattyń atynan berilse, onyń jazbasha kelisimi qajet. Konstıtýsıalyq zańnyń 44-baby 4-tarmaǵy 6) tarmaqshasynyń talaby 2024 jylǵy 1 qańtardan qoldanysqa engiziledi.
Azamattardyń joldanymdaryn qaraý kezinde zańdy ókilder, advokattar, zań konsýltanttary palatasynyń músheleri bolyp tabylatyn zań konsýltanttary, sondaı-aq zańmen, jarǵymen nemese erejemen uıymdar músheleriniń quqyqtary men múddelerin, basqa da adamdardyń quqyqtary men múddelerin qorǵaý quqyǵy berilgen osy uıymdardyń ýákiletti adamdary ókil bola alady.
Memleket basshysy Qasym-Jomart Toqaevtyń Jarlyǵymen Elvıra Ábilhasymqyzy Azımova QR Konstıtýsıalyq sotynyń Tóraǵasy laýazymyna taǵaıyndalǵan edi.
Esterińizge sala ketsek, 4 qańtarda Prezıdent Qasym-Jomart Toqaev jyl basynan qyzmetin bastaǵan Konstıtýsıalyq sottyń jańa ákimshilik ǵımaratyna baryp, taǵaıyndalǵan sýdıalarmen kezdesti.
«Shyn máninde, Konstıtýsıalyq sot – elimiz úshin óte mańyzdy ınstıtýt. Endi azamattarymyz Konstıtýsıaǵa qaıshy keletin normalardy zańsyz dep taný úshin Konstıtýsıalyq sotqa tikeleı ózderi shaǵymdana alady. Sonymen qatar Bas prokýror jáne Adam quqyqtary jónindegi ýákil de Konstıtýsıalyq sotqa júginýge quqyǵy bar. Jalpy, prokýratýra, sot, quqyq qorǵaý organdarynyń jumysyna qoıylatyn talap aıtarlyqtaı kúsheıedi. Konstıtýsıalyq sot depýtattardyń jáne Úkimettiń zań shyǵarý jumysyna oń yqpal etedi. Bir sózben aıtqanda, Konstıtýsıalyq sot adam quqyqtaryn qorǵaý júıesiniń basty tiregine aınalady», – degen edi Qasym-Jomart Toqaev.