20 myńǵa jýyq turǵyny bar Shamalǵan gaz máselesiniń zardabyn tartyp keledi.
Almaty oblysy, Qarasaı aýdany, Shamalǵan aýylynyń turǵyndary ereýilge shyqty, dep habarlaıdy Almaty-akshamy.kz Sputnik Qazaqstan saıtyna silteme jasap.
Turǵyndardyń aıtýynsha, aýylǵa gaz tasymaldaýshy «Sıgma» kompanıasy jylý tarıfin qaıta-qaıta qymbattatyp otyr.
Qarasaı aýdanynda úsh birdeı gaz kompanıasy bar. Sonyń biri – «Sıgma». Úsh kompanıanyń ishindegi qymbaty osy «Sıgma» eken, óıtkeni gazdy Reseıden tasymaldaıtyn kórinedi. Aýdannyń ózge aýyldary gazdyń bir kýbyna 26-28 teńgeden tólese, Shamalǵan aýylynyń turǵyndary gazdyń bir kýbyna 35 teńge tóleıdi.
«Sıgma kompanıasy sońǵy eki jylda gaz baǵasyn on teńgege kóterdi. Gaz qysymy óte tómen boldy. Aıazdy kúnderi tórt kún jylýsyz qaldyq. Gazdy toqtatyp tastady. Kompanıanyń qyzmet sapasy tómen», - deıdi turǵyndar.
Almatyny aıaz qysqan kúnderi Qarasaı aýdanynda birneshe aýyl jylýsyz qalǵan bolatyn. Sebep gaz qubyrlarynda sý qatyp, isten shyqqan.
Ákimdiktiń aıtýynsha, kompanıa gaz qubyrlaryn teksermegen. Ereýilge kelgen aýdan ákimi aýyl turǵyndaryna kompanıany tekserý týraly usynys aıtty.
«Sıgma» kompanıasyna bizdiń de shaǵymymyz kóp. Biraq bulaı shýlap, esh nárseni sheshpeımiz. Ol jekemenshik kompanıa bolǵandyqtan, «tarıfti túsir» dep talap qoıýǵa haqymyz joq. Negizi bul tarıfti kompanıaǵa antımonopolıa bekitip bergen. Endi biz birneshe adamnan qurylǵan komısıa quryp, kompanıanyń jumysyna tekserý júrgizemiz. Kótergen tarıfine oraı sapaly qyzmet kórsetip otyr ma, joq pa, bilýimiz kerek. Tek sodan keıin ǵana tarıfti arzandatý týraly talap qoıa alamyz», - deıdi Qarasaı aýdanynyń ákimi Jasulan Estenov.