QR Energetıka mınıstrligi óńirlerdegi jylytý kezeńiniń ótý barysyna monıtorıń júrgizedi. Bul másele Respýblıka Úkimetiniń qatań baqylaýynda, dep habarlaıdy almaty-akshamy.kz
Sońǵy táýlikte keıbir oblystardaǵy jylýmen jabdyqtaý obektilerinde tehnologıalyq buzýshylyqtar tirkeldi.
JEO-daǵy buzýshylyqtardy joıý úshin barlyq qajetti materıaldar, sondaı-aq personal tolyq kólemde bar.
Qazirgi tańda Jezqazǵan jylý elektr ortalyǵy men Kentaý jylý elektr ortalyǵynda rezervtik qazandyqtar bir kún buryn iske qosyldy. Al Rıdder JEO-da temperatýra bekitilgen kesteden tómendeýi tirkelgen joq.
Jalpy, respýblıka boıynsha elektr stansıalarynda 8 energoblok, 43 qazandyq jáne osyndaı 43 týrbınaǵa jóndeý jasaldy.
Kómir qory 4,9 mln. tonnany quraıdy, bul ótken jylǵy deńgeıden 67% - ǵa artyq. 108 myń tonna mazýt jınaldy. Barlyq JEO-da otynnyń normatıvtik qory bar.
Energetıka mınıstrligi 2023 jylǵy 1 maýsymnan bastap elektr energıasyn óndirýge arnalǵan shekti tarıfti túzetýdi júrgizdi. Bul shara elektr stansıalaryn jóndeýge 146,5 mlrd. teńge kóleminde qarjy kólemin tartýǵa múmkindik berdi.
Memlekettik qoldaý sharalary sheńberinde jekelegen jylý kózderin jylytý maýsymyna daıyndaý úshin QR Úkimetiniń rezervinen Rıdder jáne Ekibastuz qalalarynyń JEO, Aqtaý qalasynyń energıa kózderi úshin kúrdeli jóndeý, rekonstrýksıalaý jáne qajetti jabdyqtardy satyp alýǵa qarajat bólindi. Atap aıtqanda, Kókshetaý qalasynyń qazandyǵyn jóndeýge 21,5 mlrd. teńge bólindi, bul barlyq negizgi jabdyqtardy kúrdeli jóndeýge múmkindik berdi. Sondaı-aq, Kentaý qalasynyń JEO jóndeýge oblystyq búdjetten 3,7 mlrd.teńge bólindi. Sonymen qatar, elektr stansıalarynyń ıeleri shamamen 16,5 mlrd. teńgeni tikeleı salǵan.