Ádistemelik qural kókpar tartýdy úırenem degen balalarǵa usynylady.
Qazaqstanda alǵash ret «Kókpar sportynyń oqý ádistemelik quraly» daıyndaldy, dep habarlaıdy Almaty-akshamy.kz Baq.kz cilteme jasap.
Alaıda Táýelsizdik alǵaly beri bul sporttyq oqý-ádistemelik quraly jasalmaǵan edi. Bul olqylyqtyń ornyn QR Ulttyq sport qaýymdastyǵy toltyrdy. Belgili kókparshylar, jattyqtyrýshylar men tájirıbeli mamandardyń qatysýymen elimizde alǵash ret «Kókpar sportynyń oqý ádistemelik quraly» daıyndaldy.
«Basty maqsatymyz – qazaq kókparynyń, sonyń ishinde komandalyq kókpardyń damýyna, kókpar tartýdy úırenem degen balalarǵa, úıretem degen bapkerlerge, kókpar sporty kenjelep qalǵan óńirlerge ózimizdiń bilgenimizdi, óz basymyzdan ótken, elmizge tanymal kókparshylardyń basynan ótken kókparǵa qatysty tájirıbeni ortaǵa salý. Solardyń úırenýine, meńgerýine az da bolsa sep bolsyn degen nıet», – deıdi oqý quralyn daıyndaǵan mamandardyń biri ári osy oqý quralynyń avtory, kókpardan QR bas bapkeri, QR Eńbek sińirgen jattyqtyrýshy Qýanyshbek Quramaev.
Buryn-sońdy kókpar sportynan ádistemelik qural jazyldy degendi estimeppiz. Al 2021 jylǵy málimet boıynsha, ulttyq sport túrlerinen oblys ortalyqtarynda 12 mektep, 5 klýb bar. Onyń syrtynda 3 ortalyq ulttyq sport úshin jumys istep tur. Biraq eshqandaı oqý-quralynsyz.
Oqý quralynyń daıyndalýyna Ulttyq at sporty boıynsha QR Memlekettik jattyqtyrýshy, QR Eńbek sińirgen jattyqtyrýshy Núrken Baıbórıev, kókpardan QR bas bapkeri, QR Eńbek sińirgen jattyqtyrýshy Qýanyshbek Quramaev, kókpardan Almaty oblysynyń aǵa bapkeri Derbisáli Baıdildaev, QR Eńbek sińirgen jattyqtyrýshy Janysbek Saev jáne QR Eńbek sińirgen jattyqtyrýshy Nurdáýlet Momynov sıaqty mamandar eńbek sińirgen.
Sonymen qatar oqý quraly kókpar sportyn meńgerem degen jastyń qandaı jattyǵý jasap, kókpar atyn qalaı daıyndaýyna deıin, tipti kókpar shabatyn atty qalaı tańdap alýǵa bolatynyna deıin syzba-ıllústrasıamen tolyqtyrylǵan. Ilústrasıany Ulan Múpteke jasady.
Oqýlyqty daıyndaý barysynda Taraz qalasyndaǵy sport ortalyqtary men «Áýlıeata» kókpar komandasynyń jattyǵý bazasy paıdalanyldy.
Ádistemelik qural kókpar tartýdy úırenem degen balalarǵa, úıretem degen bapkerlerge kómekshi retinde usynylady.