Men – kitaphanashymyn. Meniń kásibim – men úshin tek jumys emes, rýhanı álemge aparar jol, izdenis pen tárbıe mektebi. Kitap pen oqyrmannyń arasyndaǵy altyn kópir bolý – meniń ómirlik maqsatym.
Jandar Sáýle Ilıasqyzy, Almaty sán jáne qyzmet kórsetý salasy kolejiniń kitaphana meńgerýshisi
Kitap – adam janynyń azyǵy, rýhanı baılyqtyń qaınar kózi. Ol – ulttyń tarıhyn, mádenıetin, rýhyn, taǵylymyn saqtaıtyn kıeli qazyna. Ár kitap – bir álem, ár betinde ómirdiń máni men taǵylymy jatyr. Oqyrman sol álemge enip, oı-órisin keńeıtedi, dúnıetanymyn qalyptastyrady.
Al kitaphana – sol rýhanı baılyqtyń ordasy. Bul jerden tek bilim ǵana emes, adamgershilik, tártip, mádenıet, izgilik nári taraıdy. Kitaphana – halyqtyń jany, qoǵamnyń aınasy. Munda jas urpaq óz jolyn izdeıdi, izdenedi, armandaıdy, maqsat qoıady
Men úshin kitaphana – kún saıyn ómir qaınap jatqan erekshe orta. Munda ár oqyrmannyń óz tarıhy, óz izdenisi bar. Biri emtıhanǵa daıyndalyp kelse, endi biri jan tynyshtyǵyn izdeıdi. Al keıbir jastar jańa kitaptardan shabyt alyp, óz armanyn ushtaı túsedi.
Qazirgi zamanda tehnologıanyń damýy, ınternet pen áleýmettik jelilerdiń yqpaly qanshalyqty kúsheıse de, kitaptyń qudireti óz mánin joǵaltqan joq. Kitap – máńgilik ustaz. Ol adamdy sabyr men parasatqa, oılaý mádenıetine baýlıdy. Al kitaphanashynyń mindeti – sol rýhanı baılyqqa jol siltep, jastardy kitap oqýǵa baýlý.
Men óz isime úlken jaýapkershilikpen qaraımyn. Sebebi árbir kelgen oqyrmanǵa durys baǵyt berý, qyzyqty kitap usyný – rýhanı tárbıe berýdiń alǵashqy qadamy. Biz, kitaphanashylar, jastardyń boıyna kitapqa degen súıispenshilik uıalatyp, oqý mádenıetin qalyptastyrýǵa atsalysamyz.
Men kitaphanashy retinde stýdenttermen únemi tyǵyz baılanys ornatýǵa tyrysamyn. Kitaphana – tek tynyshtyq mekeni emes, shyǵarmashylyq pen izdenistiń ordasy. Munda túrli ádebı keshter, tanymdyq kezdesýler, poezıa saǵattary, kitap kórmeleri ótkiziledi. Osyndaı sharalar arqyly stýdentter men jastar óz oılaryn erkin jetkizip, ónerin tanytyp, rýhanı tolysady. Apta saıyn top jetekshilerimen birlese otyryp, stýdentterdi kópshilik kitaphanaǵa aparyp, jańa ádebıettermen, kórkem shyǵarmalarmen tanystyramyz. Sondaı-aq kitap kórmeleri, ádebı saǵattar men oqyrmandar klýbtaryn uıymdastyryp, olardyń kitapqa degen qyzyǵýshylyǵyn arttyrýǵa kúsh salamyz.
Kópshilik kitaphana – tek oqý orny ǵana emes, oı almasý men ózindik kózqaras qalyptastyratyn mádenı orta. Onda stýdentter tek kitap oqyp qana qoımaı, pikirtalasqa qatysyp, óz oıyn erkin jetkizýge úırenedi. Biz «Kitap – rýhanı qazyna», «Dosyńa kitap syıla», «Meniń súıikti kitabym» sıaqty is-sharalar ótkizip, jastardyń shyǵarmashylyq qabiletin damytýǵa yqpal etip kelemiz.
Kitaphananyń ár sóresinde ǵasyrlar boıy jınaqtalǵan danalyq pen bilim jatyr. Sol bilimdi oqyrman júregine jetkizý – men úshin úlken mártebe. Sebebi meniń eńbegimniń nátıjesi – jastardyń kitapqa degen qyzyǵýshylyǵy men olardyń rýhanı baılyǵynyń artýy.
Qoryta aıtqanda, kitap – adam ómiriniń shamshyraǵy, al kitaphana – sol shamnyń jaryǵyn taratyp turǵan orda.
Biz, kitaphanashylar, rýhanıattyń qyzmetshisimiz. Kitap arqyly sana qalyptastyryp, júrekterge izgilik uıalatamyz. Kitap – máńgilik qundylyq. Al kitaphanashynyń eńbegi – sol qundylyqty keler urpaqqa jetkizý. Ár oqyrmannyń júzinen qyzyǵýshylyq pen izdenisti kórgende, óz isimniń mańyzdylyǵyn sezinemin.
Men úshin kitaphana – rýhanı tynys, bilim men tárbıe ordasy. Stýdenttermen birge ár kúndi kitap áleminde ótkizý – meniń ómirimdegi maqsattarymnyń bireýiniń oryndalǵany dep bilemin.Sondyqtan da ár adam kitaphanany óz rýhanı otbasyndaı kórip, kitapty ómirlik serigi etýi kerek.