Kıno - ónerdiń tóresi.
Kıno arqyly qoǵamdaǵy kóptegen máseleni sheshýge bolady. Sheshilip te jatyr. Bul týraly akter, QR Mádenıet qaıratkeri Bolat Mamytbekov Almaty-akshamy.kz-ke bergen suhbaty barysynda aıtty.
Eger jaqsy jaǵyna qaraı jumys jasaı bilse, kınonyń adamzatqa paıdasy zor ekendigin aıtady akter. Onyń aıtýynsha, qazirgi tańda kıno salasynda, kıno ındýstrıasynda kóptegen jaqsy jańalyq bolyp jatyr. Búgingi tańda elimizde jylyna úsh júz-tórt júzdeı fılmder jaryq kórýde.
«Qazaqstan ǵaryshtap damyǵan saıyn, kıno óneri de damyp kele jatyr», - deıdi akter.
Búgingi «Tomırıs» fılmderi kezindegi «Qyz Jibek» sıaqty álemge tanylyp jatqanyn aıtqan ol, qazirgi kıno salasyndaǵy akter, rejıserlerdiń jumysy sheteldik mamandardan esh kem emestigin alǵa tartty. Kıno salasy mamandarynyń, tipten sheteldik áriptesterinen asyp túsetin de tustary bar eken.
«Kınony qolǵa alǵanda árkim óziniń maqsatyna qaraı jumys isteıdi. Biri kınony qarjy tabý maqsatynda túsirse, endi biri keremet tarıhı týyndy jasaýdy maqsat etedi», - dedi akter.
Ol óziniń negizgi maqsattarynyń biri adamzatqa oı salatyn, izgilikke bastaıtyn kıno túsirý, tarıhı týyndy jasaý ekendigin de jasyrmady.
«Meniń negizgi maqsat-múddem tarıhı týyndy jasaý. Akter bolǵannan keıin túrli kıno janrlaryna usynystar túsip jatady. Komedıa janrlarynda oınadym. Bunyń bári árıne, tájirıbe jınaýǵa, ózińdi damytýǵa, bir orynda toqtap qalmaýǵa úlken qyzmet jasaıdy. Keıde, tipti jasyratyny joq, qarjy kózi úshin de rólderdi somdaýyńa týra keledi», - deıdi ol.
Ol stýdent kezden Sháken Aımanovty kóp zerttegen. Aımanov oınaǵan rólderdi somdap kórý onyń basty armandarynyń biri.
«98 jyldar ekinshi kýrsta oqyp júrgen kezimde mende Sháken Aımanovtyń 100 jyldyǵynda ne spektáklden, ne kınodan oryn alamyn degen arman paıda boldy. Biraq ázirge ol armanyma jete almadym. Ol bolashaqtyń enshisinde dep úmittenemin. Sháken Aımanov oınaǵan rólderdi, beınelerdi somdap kórgim keledi. Aımanov – uly rejıser, jan-jaqty kemeldikke jetken adam. Sol kisideı bolýdy armandaımyn», - deıdi Bolat Mamytbekov.
Mádenıet qaıratkeri Bolat Mamytbekov kıno fılmderde rólderdi somdaýmen qatar, rejıserlikpen de aınalysyp, spektáklder de qoıady, teatrda da oınaıdy. Óziniń aıtýynsha, mundaı shyǵarmashylyqpen aınalysý oǵan oıyn shyńdaýǵa septigin tıgizedi. Keıingi tórt-bes jylda shákirtter tárbıelep júrgen ol dramatýrgıany da qolǵa alǵanyn aıtty. Tek ony ázirge qupıa saqtaǵandy jón kórdi. Ýaqyty kelgende jaryqqa shyǵyp, kórermenmen qaýyshatyn sátti kútýde.
Onyń osynaý mamandyqty tańdaǵan sátten beri, sanasynyń túkpirinde saqtalyp turǵan negizgi maqsattary da bar. Ol maqsattaryna jetetinine de senim artady.
«Eń aldymen, «Kókshetaý» poemasy boıynsha kıno túsirsem degen oı bar. Bul poema tolǵan danalyq, tereń fılosofıa. Osyny kınoda kórsetkim keledi. Odan keıin Oralhan Bókeıdiń «Ataý keresine» kıno jasaǵym keledi. Sanamnyń túkpirinde saqtalyp turǵan taǵy bir arman-maqsatym Ospan batyr týraly fılm jasaý», - dedi mádenıet qaıratkeri.
Aıta keteıik, Bolat Mamytbekov alǵashqy rólin «Mektep» serıalynda hımıa pániniń muǵalimin somdaýdan bastaǵan. Keıin «Habar» tele arnasy túsirgen «Meniń taǵdyrym» kınosyna jáne «Ata-ana. Bala-shaǵa.» komedıasyna, «Alpystan asyp baramyn», «Ádilet alańy», t.b. fılmderge túsken.
Eske sala ketsek, búgin elimizde Kıno kúni atalyp ótýde.