Jeltoqsan aıynyń basynan beri elimizdiń óńirlerinde 250-den astam aýyl sharýashylyǵy jármeńkesi uıymdastyrylyp, oǵan mıllıonǵa jýyq azamat qatysty, dep habarlaıdy aqshamnews.kz
Bul týraly negizgi azyq-túlik ónimderiniń baǵasyn turaqtandyrý jónindegi keńeste vıse-premer Serik Jumanǵarınniń tóraǵalyǵymen ótken jıynda málimdeldi. Saýda jáne ıntegrasıa birinshi vıse-mınıstri Aıjan Bıjanovanyń aıtýynsha, jármeńkeler turǵyndar arasynda úlken suranysqa ıe bolyp, usynylǵan ónimder tolyqtaı satylyp jatyr.
«Eń kóp satylǵan ónimderdiń qatarynda kartop kósh bastap tur: Qaraǵandy oblysynda – 110 tonna, Almatyda – 90 tonna, al Shymkentte merekelik demalys kúnderi 45 tonna kartop satyldy», – dedi birinshi vıse-mınıstr.
Sonymen qatar, jármeńkelermen birge saýda sórelerine turaqtandyrý qorlarynan kókónister shyǵarylyp jatyr. Aýyl sharýashylyǵy vıse-mınıstri Ermek Kenjehanulynyń dereginshe, 19 jeltoqsan kúngi málimet boıynsha, turaqtandyrý qorlarynan 9,2 tonna kartop, 2,6 tonna sábiz, 2,8 tonna pıaz jáne 2,1 tonna qyryqqabat satylǵan. Aldaǵy mamyr aıyna deıin kókónisterdi satý kestesi óńirlerdiń qajettiligin eskere otyryp jasaldy.
Apta qorytyndysy boıynsha áleýmettik mańyzy bar azyq-túlik ónimderiniń baǵasy 0,1%-ǵa ósti, al jyl basynan beri bul kórsetkish 1,1%-dy qurady.
Keńes sońynda Serik Jumanǵarın jármeńkelerdi odan ári belsendi ótkizýdi jáne mereke qarsańynda baǵanyń negizsiz ósýine jol bermeý úshin saýda salasynda memlekettik baqylaýdy kúsheıtýdi tapsyrdy.