Aalto University joǵarǵy oqý ornynyń zertteý nátıjesinde úkimetter men halyqaralyq uıymdar paıdalanatyn jahandyq derekter bazasy álemdegi aýyl halqynyń sanyn 53-84%-ǵa jete baǵalamaıtyny anyqtaldy.
Bul jaıynda islam.kz portaly hightech.fm aqparat kózine silteme jasaı otyryp málim etedi, dep habarlaıdy aqshamnews.kz.
Fın zertteýshileri álem halqy týraly ǵalamdyq derekter jıynynan eleýli qate tapty. Álemdik aýyl halqynyń statısıkalyq málimetin jete baǵalamaý óz kezeginde resýrstardy bólý jáne ınfraqurylymdy josparlaý salasyndaǵy eleýli qatelikterge ákep soǵýy múmkin. Ǵalymdar alǵash ret resmı statısıkadan álemdegi aýyl halqynyń edáýir bóligi is júzinde «joq» ekendigin dáleldeıtin aıǵaqtar keltirdi. Halyq sanynyń eń tanymal bes derekter jıyntyǵynyń dáldigin tekserý úshin zertteýshiler standartty emes tásildi qoldandy: olar 1975-2010 jyldar aralyǵynda álemniń 35 elinde 300 bóget salý barysynda aýyl halqynyń qonys aýdarýy týraly derekterdi zerttedi.
«Aýyldyq jerlerde turatyn adamdardyń naqty sany jahandyq derekterden áldeqaıda joǵary ekenin baıqaǵanymyzǵa tań qaldyq», - dep atap ótti Aalto ýnıversıtetiniń zertteýge atsalysqan ǵalymy Jozıas Leng-Rıtter.
Onyń aıtýynsha, bul derekter jıyntyǵy myńdaǵan zertteýler men saıası sheshimderde qoldanylady, alaıda, olardyń dáldigi buryn júıeli túrde baǵalanbaǵan. Halyq sanyn esepteýdegi teris birjaqtylyq kúlli álemde júıeli sıpat alǵan, ásirese, Qytaı, Brazılıa, Avstralıa, Polsha jáne Kolýmbıada derekter arasyndaǵy alshaqtyq erekshe kózge túsken. Álem halqynyń shamamen 43%-y aýyldyq jerlerde turatynyn eskersek, júzdegen mıllıon adam sanaqqa kirmeı qalǵan. Bul taraptaǵy zertteý avtorlary halyq sany týraly derekterdi jınaý ádistemesin qaıta qaraýǵa jáne aýyl turǵyndaryn neǵurlym muqıat esepke alýǵa shaqyrady.