Mundaı qyzmetterdi smartfon arqyly qoljetimdi etý qajet.
Premer-Mınıstr Álıhan Smaıylov jumyssyzdarǵa bos jumys oryndary týraly elektrondy habarlamalar jiberý máselesin pysyqtaýdy tapsyrdy, dep habarlaıdy Almaty-akshamy.kz.
Ol bıyl Ulttyq jobalardy iske asyrý aıasynda 269 myńnan asa jumys orny qurylýy tıis ekenin atap ótti. Qazir 203 myńnan astam adam jumysqa ornalasqan. Alaıda 175 myńy – ýaqytsha jumys.
«Biz turaqty jumys oryndaryn kóbeıtýge kúsh salýymyz kerek. Ol úshin sıfrlyq tehnologıalarǵa súıený mańyzdy. Memlekettik organdardyń júıelerin tolyq ıntegrasıalaı otyryp, jumyspen qamtý servısteriniń barlyǵyn sıfrlandyrý qajet», - dedi Smaıylov.
Otbasynyń sıfrlyq kartasy, Elektrondy eńbek bırjasy men Jumys oryndaryn qurýdyń ıntegrasıalanǵan kartasyn biriktirgennen keıin, jumyssyz júrgenderge elektrondy habarlamalar arqyly vakansıalar usynýǵa bolady, - dep jalǵastyrdy sózin Premer-Mınıstr.
«Jumyssyzdarǵa ótinish jazbaı-aq bos jumys oryndaryn usyný mańyzdy. Mundaı qyzmetterdi smartfon arqyly qoljetimdi etý qajet», - dedi Úkimet basshysy.
Smaıylov Prezıdenttiń tapsyrmasymen memlekettik organdar men barlyq deńgeıdegi ákimderdiń jumysy jańa jumys oryndaryn qurý boıynsha KPI kórsetkishi negizinde baǵalanatynyn eske saldy.
Sondaı-aq ol jastardy jumyspen qamtýdyń jańa tásilderi men mehanızmderin engizýge erekshe nazar aýdarýdy tapsyrdy.
«Jyl saıyn eńbek naryǵyna 300 myńǵa jýyq jas shyǵady. Olardyń jumys tájirıbesi joq, sondyqtan jastarǵa birinshi kezekte jumysqa ornalasýǵa kómektesý kerek», - dedi Premer-Mınıstr.
Smaıylov tıisti mınıstrlikterge eńbek adamynyń oń ımıjin qalyptastyrýdy tapsyrdy.