Akmola oblysyndaǵy jappaı jol apaty: evakýatorlar kólikterdi oqıǵa ornynan áketýde
Astana – Petropavl tasjolynda búgin bolǵan jappaı jol apatynyń saldaryn joıý jumystary jalǵasýda. Qazirgi ýaqytta joldy tazalaý jáne qutqarý operasıalary júrgizilip jatyr. Oqıǵa ornyna shamamen 20 evakýator jetkizildi, dep habarlaıdy aqshamnews.kz
«QazAvtoJol» málimetinshe:
- 3 qańtar, saǵat 19:00-degi jaǵdaı boıynsha Astana – Petropavl tasjolyndaǵy apattan 95 kóliktiń 24-i evakýatorlarmen shyǵaryldy.
- 30 kólik óz júrisimen oqıǵa ornynan ketken.
- Apat ornynda áli de 41 kólik qalýda.
- Qutqarý jumystaryna 34 arnaıy tehnıka men 20 adam jumyldyrylǵan.
Mobıldi jylytý pýnktinde azamattarǵa ystyq tamaq pen shaı usynylýda.
Japa shekkender týraly aqparat
Aqmola oblysy densaýlyq saqtaý basqarmasynyń málimetinshe: apat saldarynan 20 adam jaraqat alǵan, olardyń ishinde segiz bala bar.
- Aqkól aýdandyq aýrýhanasyna úsh adam túrli deńgeıdegi jaraqattarmen jetkizildi. Barlyǵynyń jaǵdaıy turaqty.
- Bulandy aýdandyq aýrýhanasyna 11 adam tústi, olardyń beseýi, sonyń ishinde bir bala, aýrýhanaǵa jatqyzyldy. Qalǵan alty adam ambýlatorlyq em qabyldaýda.
- Býrabaıdaǵy medısınalyq ortalyqqa tórt adam jetkizildi, olardyń biri aýrýhanaǵa jatqyzyldy, úsheýi ambýlatorlyq em qabyldaýda.
- Astanadan eki bala aýrýhanaǵa jatqyzyldy.
- 2021 jyly týǵan balada bas súıek-mı jaraqaty men mı shaıqalý kúdigi bar.
- 2009 jyly týǵan jasóspirimde kókirek tusynyń jabyq jaraqaty jáne tize býynynyń soqqydan alǵan jaraqaty anyqtalǵan.
Barlyq aýrýhanaǵa jatqyzylǵandardyń jaǵdaıy turaqty dep baǵalanýda.