Senatorlar Almaty qalasynyń bas josparyn ázirleýdiń jańa tásilderimen tanysty
Parlament Senatynyń Halyqaralyq qatynastar, qorǵanys jáne qaýipsizdik komıtetiniń depýtattary Almaty qalasynyń Bas josparynyń jobasymen tanysty. Depýtattarǵa bas jospardy ázirleý tásiliniń basty jańalyǵy – ozyq sıfrlyq tehnologıalar men jobalaýdyń álemdik tájirıbesin paıdalaný bolǵandyǵy týraly aıtyldy. Senatorlarǵa sondaı-aq, qurylys qurylymdarynyń jalpy jaı-kúıin aldyn ala tekserý jáne baǵalaý úshin jyljymaıtyn múlik obektilerine pasporttaý júrgizilgeni týraly habarlandy.
Senat depýtattary Almaty qalasynyń Tótenshe jaǵdaılar departamenti basshysynyń mindetin atqarýshy Erlan Álibekovtiń baıandamasyn tyńdady. Ol jer silkinisi kezinde halyqty is-áreketke daıyndaý júıeli túrde júrgizilip jatqany týraly aıtty. Ótken jyldyń 2 jeltoqsanynda jospar boıynsha megapolıstiń 600 nysanynda jalpy qalalyq seısmıkalyq jattyǵý ótkizildi jáne oǵan 760 myńnan astam Almaty turǵyny qatysty. Aǵymdaǵy jyly jalpy qalalyq seısmıkalyq jattyǵýlar sáýir jáne qyrkúıek aılaryna josparlanǵan.
Senator Ǵalıasqar Sarybaev halyqpen jıi jumys júrgizý, onyń ishinde zardap shekkenderdi qabyldaý pýnktteri boıynsha TJD qyzmeti jóninde aqparattyq-túsindirýdi qolǵa alý qajettigin atap ótti. Al depýtat Janna Asanova Almaty qalasynyń barlyq turǵyndary men qonaqtary qajetti aqparatqa ıe bolýy úshin «Dármen» ınternet-qosymshasyn ózektendirýdi usyndy.
Sonymen qatar, senatorlarǵa Daǵdarys ortalyǵynyń jumysy, sel qaýpiniń avtomattandyrylǵan monıtorıńi júıesi jáne «Aral» habarlandyrý júıesi kórsetildi.
Senatorlar Tótenshe jaǵdaılar mınıstrliginiń Respýblıkalyq jedel-qutqarý jasaǵynyń qyzmetkerlerimen mańyzdy máselelerdi talqylady. Sondaı-aq, seısmologıa ınstıtýtynda da boldy.
«AQSHAM-AQPARAT»