Egis alqaptary 1,4 myń gektarǵa ulǵaıady.
Almaty oblysyndaǵy mamandar kóktemgi egis jumystaryna daıyndyq júrgizip jatyr. Ústimizdegi jyly Almaty oblysyndaǵy sharýalardyń egis alqaptary 973,6 myń gektar bolmaq. Bul ótken jylmen salystyrǵanda 1,4 myń gektarǵa ulǵaıady degen sóz, dep habarlady Almaty-akshamy.kz.
Mamandardyń aıtýynsha, mıneraldy tyńaıtqyshtarǵa bıyl jergilikti búdjetten 2 mlrd teńgeden astam sýbsıdıa bólingen, 43,7 myń tonna tyńaıtqyshty qoldaný josparlanýda.
«Degenmen tyńaıtqysh baǵasynyń eki esege ósip ketkeni sharýashylyqtarǵa qıyndyq týǵyzýda. Jaýyn-shashynnyń, qardyń azdyǵy bıyl da dıhandarǵa aýyrtpashylyq salmaq. «Qazgıdromettiń» boljamynda oblysta ylǵal jınaqtaý kezeńinde jaýyn-shashyn orta eseppen 16-38%-ǵa azaıǵan, al oblys taýlarynda qar qory ortasha alǵanda 24-47%-ǵa az.Oblystaǵy sýarý jelileri men gıdrotehnıkalyq qurylystardyń tozýynan kanaldardaǵy sý shyǵyny da artyp keledi. Bul máseleni sheshý úshin oblystyń 16 aýdanyndaǵy 113,8 myń gektar sýarmaly jerdi qalpyna keltirý úshin sýarý jelilerin rekonstrýksıalaý jumystary júrgizilýde», - delingen Almaty oblysy ákiminiń baspasóz qyzmetiniń habarlamasynda.
Osy maqsatta jobalyq smetalyq qujattama ázirleýge jergilikti búdjetten 3,4 mlrd teńge bólindi.
Qazirgi ýaqytta qurylys-montaj jumystary Aqsý, Eskeldi, Qarasaı aýdandarynda jáne Taldyqorǵan qalasynda, qosymsha Islam damý bankiniń qarajatymen 2 aýdanda júrgizilýde.
Oblys ákimi Qanat Bozymbaev sý qoryn únemdi tıimdi paıdalaný úshin agrarlyq sharýashylyqtar ylǵal saqtaý tehnologıasyna kóshýi tıis ekenin aıtty. Jalpy oblysta 20,7 myń gektardan astam jerge tamshylatyp jáne jańbyrlatyp sýarý qondyrǵylary ornatylǵan, ıaǵnı óńirde resýrstyq tehnologıany qoldaný deńgeıi 4,7% ǵana.
«Kóktemgi dala jumystaryna daıyndyq - barlyq aýdan, qala ákimderiniń aldynda turǵan negizgi mindettiń biri. Búgingi aıtylǵan sýarý júıelerin qaıta jańǵyrtý, sý qoımalaryn salý, sý tarıfin, mıneraldy tyńaıtqyshtar men janar-jaǵar maı baǵasyn retteý, aýyl sharýashylyǵy tehnıkalaryn jańartý sıaqty máselelerdi bir-aq kúnde sheshý múmkin emes. Biraq naqty jospar jasap, kezeń-kezeńimen qarjylandyra otyryp sheshýge bolady. Osy oraıda egis alqaptarynda sýdy únemdeý jáne ylǵal saqtaý tehnologıalaryn engizý jumystaryna erekshe mán berý kerek. Kepildendirilgen dızel otynyn jetkizýdiń bekitilgen kestesine sáıkes janar-jaǵarmaıdy ýaqytyly jetkizýdi jáne mashına-traktor parkin jańartý máselelerin baqylaýǵa alýdy tapsyramyn. Kóktemgi dala jumystaryn ýaqytyly júrgizý úshin nesıe berý jandandyrylyp, qarajattyń ıgerilýi qamtamasyz etilsin. Sýarmaly sýdy ýaqtyly berý úshin sýarý arnalary men sý sharýashylyǵy qurylystaryn daıyndaý sharalary qabyldansyn. Bul jumystar joǵary ónim alýǵa yqpal etedi dep sanaımyn», - dedi Qanat Bozymbaev selektorlyq keńeste.