Oljas Súleımenov jańa shyqqan eńbekterin QR Ulttyq kitaphana qoryna syıǵa tartty.
Qazaqstan Respýblıkasy Táýelsizdiginiń 30 jyldyq mereıtoıy qarsańynda jáne Semeı ıadrolyq synaq polıgonynyń jabylǵanyna 30 jyl tolýyna oraı Oljas Súleımenov «Nevada-Semeı» antıadrolyq qozǵalysynyń ardagerlerin jáne QR UǴA-akademıgi T.I. Espolovty «Halyqaralyq Nevada – Semeı Antıadrolyq qozǵalysynyń 30 jyldyǵy merekelik medalimen» marapattady, dep habarlaıdy Almaty-akshamy.kz.
Merekelik medaldar Qazaqstan Respýblıkasy Mádenıet jáne sport mınıstrligine qarasty QR Ulttyq kitaphanasynyń N.Dáýletova atyndaǵy zalynda Qazaqstan Respýblıkasy Táýelsizdiginiń 30 jyldyq mereıtoıy qarsańynda jáne Semeı ıadrolyq synaq polıgonynyń jabylǵanyna – 30 jyl tolýyna oraı ótken «Jerge tabyn, adamzat!» jıyny barysynda tabys etildi.
Shara moderatory belgili jýrnalıs, «Nevada-Semeı» antıadrolyq qozǵalysynyń vıse-prezıdenti Jandáýletov Valerıı Aıtmuqashuly. Dóńgelek ústelde mádenıettanýshy-ǵalym, dıplomat, memleket jáne qoǵam qaıratkeri Áýezov Murat Muhtaruly, ǵalym, Ekonomıka ǵylymdarynyń doktory, profesor, QR UǴA-akademıgi, Qazaq Ulttyq agrarlyq ýnıversıteteiniń rektory Espolov Tilektes Isabaıuly, belgili jýrnalıs, Qazaqstan Ulttyq jaratylystaný ǵylymdar akademıasynyń akademıgi Shalahmetov Ǵadilbek Minájuly jáne «Nevada-Semeı» antıadrolyq qozǵalysynyń ardagerleri Oljas Súleımenovke jyly lebizderin bildirip, usynystaryn ortaǵa saldy.