Májilis "Jer ýchaskelerin berý prosesin sıfrlandyrý týraly" zań jobasyn maquldady
Májilistiń birinshi oqylymynda elimizdegi jer ýchaskelerin berý prosesin sıfrlandyrýǵa qatysty zań jobasy maquldandy, dep habarlaıdy Almaty-akshamy.kz QazAqparatqa silteme jasap.
«Búginde jer úshin, ol jerdegi jyljymaıtyn múlik úshin bólek memlekettik akt beriledi. Endigi ýaqytta ekeýi biriktirilip bir ǵana memlekettik akt bolady. Atalǵan jańashyldyq júıeni, salany damytý úshin qabyldanyp otyr. Óıtkeni halyqaralyq tájirıbe boıynsha jer men jyljymaıtyn múlik birge júredi. Mysaly, Nıderland, Ońtústik Koreıa jáne kóptegen elderde kadastrlyq tólqujat árdaıym jer jáne jyljymaıtyn múlikpen birge bolady. Meniń oıymsha, kadastrlardy biriktirý tıimdi. Sondaı-aq azamattar úshin quqyqtyq jáne jer kadastry týraly, qoǵamdyq kadastrlyq kartadaǵy jyljymaıtyn múlik obektileri týraly aqparattyń ashyqtyǵy men qoljetimdiligin qamtamasyz etedi», - dedi QR Sıfrlyq damý, ınovasıalar jáne aeroǵarysh ónerkásibi vıse-mınıstri Áset Turysov Májilis otyrysynda.
Vıse-mınıstrdiń málimdeýinshe, jańa memlekettik kadastrlyq karta arqyly bos jer ýchaskeleri týraly aqparat alýǵa bolady.
«Karta arqyly bos jáne ózińizge unaǵan jer ýchaskesin tańdap, onyń aýksıonǵa shyǵýy týraly ótinish bere alasyz. Sodan soń «Elektrondy úkimettegi» jeke kabınetińizge habarlama keledi. Osylaısha bos jer ýchaskelerin alý boıynsha ashyqtyq pen qoljetimdilik arta túsedi», - deıdi ol.
Májilis depýtaty Aıqyn Qońyrov atalǵan zań jobasyna birqatar túzetý engizilgeni týraly aıtty.
«Úkimet jer berý tártibi eki jolmen retteledi dep boljady. Iaǵnı elektrondy formatta jáne saýda-sattyq arqyly. Alaıda el aýmaǵy ınternetpen tolyq qamtylmaǵandyqtan, jumys toby elordanyń, respýblıkalyq, oblystyq jáne aýdandyq mańyzy bar qalalardyń jerleri úshin ǵana jer ýchaskelerine quqyq berýdiń elektrondy formatyn engizý týraly sheshim qabyldady. Bul «Elektrondy úkimettiń» veb-portaly arqyly jarıa kadastrlyq karta arqyly júzege asyrylady», - dedi Aıqyn Qońyrov.
Onyń aıtýynsha, jer ýchaskesine quqyq berý prosesterin avtomattandyrýǵa baılanysty jer komısıasynyń ınstıtýty, sondaı-aq joǵaryda atalǵan aýmaqtarda jer-kadastrlyq josparyn ázirleý jáne bekitý alynyp tastalady.
«Bul tıisti ótinishterdi qaraý merzimin edáýir qysqartady. Osyndaı tetik eldi mekenderde ornalasqan jer ýchaskeleriniń nysanaly maqsaty ózgergen kezde de qoldanylady. Sonymen qatar jer ýchaskesi men ǵımaratqa qatysty qujat sany azaıady. Osylaısha jer aktisi men tehpasport jyljymaıtyn múlik obektisiniń kadastrlyq pasporty túrinde bir qujatqa biriktiriledi», - deıdi ol.