Azamat 10 táýlikke ákimshilik qamaýǵa alynbaq
Turǵyn úı kesheniniń birinde lıftti qıratqan qaraǵandylyq on táýlikke ákimshilik qamaýǵa alyndy, dep habarlaıdy Almaty-akshamy.kz Tengrinews.kz-ke silteme jasap.
Usaq buzaqylyq týraly is Qaraǵandy qalasynyń Ákimshilik quqyqbuzýshylyqtar jónindegi mamandandyrylǵan aýdanaralyq sotynda qaraldy. Sotta oqıǵa Qaraǵandydaǵy Saryarqa kóshesindegi №6 úıdiń lıftinde bolǵany anyqtaldy.
Lıft isten shyǵyp, toqtap qalǵannan keıin quqyqbuzýshy mamandardy kútpesten, ózin agressıvti ustap, lıft esigine zıan keltirgen, keıin ishinde ornatylǵan beınebaqylaý kamerasyn buzýǵa tyrysqan.
«Óziniń is-áreketimen ol aınalasyndaǵylarǵa qurmetsizdik kórsetip, qoǵamdyq tártip pen jeke tulǵalardyń tynyshtyǵyn buzdy. Sotta ol kinásin moıyndady. Onyń áreketin is materıaldary, beınebaqylaý kamerasynan beınejazba jáne taǵy da basqa aıǵaqtar rastaıdy», - dep habarlady Qaraǵandy qalasynyń Ákimshilik quqyqbuzýshylyq jónindegi mamandandyrylǵan aýdanaralyq sotynyń baspasóz qyzmeti ókilderi.
İsti qaraý nátıjeleri boıynsha, tártip buzýshy usaq buzaqylyq jasaǵany úshin kináli dep tanylyp, oǵan 10 táýlik merzimge ákimshilik qamaý túrinde jaza taǵaıyndaldy. Qaýly zańdy kúshine engen joq.