Úkimet basshysy qazaqstandyq saýda-ınvestısıalyq forýmǵa qatysty
QR Premer-Mınıstri Asqar Mamın Birikken Arab Ámirlikterine resmı saparmen baryp, «EXPO 2020 Dubai» dúnıejúzilik kórmesinde Qazaqstannyń ulttyq kúni aıasyndaǵy is-sharalarǵa qatysty, dep habarlaıdy Almaty-akshamy.kz primeminister.kz-ge silteme jasap.
EKSPO-nyń Ál-Ýasl Plaza ortalyq alańynda QR Premer-Mınıstri A. Mamın men toleranttylyq jáne qatar ómir súrý máseleleri jónindegi mınıstr, «EXPO 2020 Dubai» bas komısary sheıh Nahaıan bın Mýbarak ál Nahaıannyń qatysýymen Qazaqstan Respýblıkasynyń ulttyq týyn kóterý rásimi ótti.
Úkimet basshysy qazaqstandyq saýda-ınvestısıalyq forýmǵa qatysty, onda 100-ge jýyq adam – QR men BAÁ memlekettik organdarynyń, iskerlik ortalarynyń, ulttyq holdıńteri men damý ınstıtýttarynyń ókilderi bas qosty.
«Búgingi tańda Qazaqstan men Birikken Arab Ámirlikteri arasyndaǵy qarym-qatynas sapaly jańa deńgeıge kóterildi. 1991 jyldan bastap BAÁ QR ekonomıkasyna $4 mlrd astam ınvestısıa saldy. Qazaqstanda BAÁ kapıtalynyń qatysýymen 250-den astam kompanıa jumys isteıdi. Jahandyq ekonomıkada saqtalyp otyrǵan syn-tegeýrinderge qaramastan, elderimizdiń yntymaqtastyǵy nyǵaıa túsýde», -dedi A. Mamın forýmnyń plenarlyq sesıasynda sóılegen sózinde.
Úkimet basshysy ekijaqty qarym-qatynastaǵy mańyzdy oqıǵa bıylǵy qazan aıynda ekonomıkanyń basym salalarynda jobalardy damytý boıynsha uzaqmerzimdi strategıalyq seriktestik ornatý týraly úkimetaralyq kelisimge qol qoıý bolǵanyn atap ótti. Qujat Qazaqstan ekonomıkasynyń energetıkalyq, agroónerkásiptik, kólik-logıstıkalyq, farmasevtıkalyq jáne qarjy sektorlaryndaǵy jobalardy iske asyrýǵa baǵyttalǵan, ınvestısıalardyń jalpy kólemi $6 mlrd-tan asady.
Forýmnyń plenarlyq sesıasynda energetıka mınıstri Maǵzum Myrzaǵalıev, «Samuryq-Qazyna» AQ basqarma tóraǵasy Almasadam Sátqalıev, BAÁ energetıka jáne ınfraqurylym mınıstri Sýheıl ál-Mazrýı, BAÁ memlekettik mınıstri Ahmed Álı ál-Saıeh jáne t. b. sóz sóıledi.
Forým qorytyndysy boıynsha, «Samuryq-Qazyna» AQ men Abu Dhabi Developmental Holding Company (ADQ) táýelsiz qory arasynda strategıalyq yntymaqtastyq týraly kelisimge, sondaı-aq QR-da jalpy qýattylyǵy 4 GVt bolatyn kún jáne jel elektr stansıalaryn salý boıynsha ınvestısıalyq qujattarǵa qol qoıyldy.
Qazirgi ýaqytta ámirlikter kompanıalary Qazaqstanda jalpy quny $3,5 mlrd-tan asatyn 11 iri ınvestısıalyq jobany iske asyrýǵa qatysyp jatyr.
QR Premer-mınıstri A. Mamın Dýbaı qalasyna sapary aıasynda «QazTrade saýda saıasatyn damytý ortalyǵy» AQ sıfrlyq kórmesimen tanysyp, «EXPO 2020 Dubai» kórmesiniń taqyryptyq pavılondaryn aralady, sondaı-aq BAÁ jetekshi kompanıalarynyń basshylyǵymen kelissózder júrgizdi.
Qazaqstannyń ulttyq kúnin merekeleý barysynda EXPO aýmaǵynda dúnıejúzilik kórme qonaqtary úshin N. Tilendıev atyndaǵy «Otyrar sazy» akademıalyq fólklorlyq-etnografıalyq orkestriniń, opera ánshisi Marıa Mýdráktyń, «Astana balet» ujymynyń jáne Qazaqstannyń basqa da ártisteriniń qatysýymen konsert ótti.